हस्तकलाया निर्यात अप्वल
येँ / (सन्ध्या टाइम्स) नेपालं थीथी देशय् निर्यात याना वयाच्वंगु हस्तकलाया ज्वलनय् थुगु आर्थिक दँय् जक थगुने स्वयां २८ प्रतिशतं वृद्धि जूगु खँ नेपाल हस्तकला महासंघं धाःगु दु ।
महासंघं बिउगु जानकारी कथं थुगु आर्थिक दँया वंगु झिंछलाया दुने जक करीब २ गू अर्ब ७० गू करोड १८ गू लाखया नेपाली हस्तकलाया ज्वलंत थीथी देशय् निर्यात जूगु दु ।
दकलय् मध्ये अप्वः टेक्सटाइल ज्वलंत निर्यात जूगु नं महासंघं धाःगु दु । महासंघं पित बिउगु निर्यात सम्बन्धी तथ्यांकय् टेक्सटाइलया निर्यात नं थगुने स्वयां १ गू अर्ब नीन्यागू करोड ९३ गू लाखं २४ प्रतिशतं वृद्धि जूगु दु ।
अथे हे गैरटेक्सटाइलया ज्वलंत न्यागू प्रतिशतं वृद्धि जूगु दु । थगुने स्वयां थुगुसी गैरटेक्सटाइलया ज्वलंत १ गू अर्ब १४ गू करोड ४१ गू लाख बराबरया निर्यात जुगु उगु तथ्यांकय् उल्लेख जुयाच्वंगु दु ।
टेक्सटाइल मध्यय् नं पस्मिना ज्वलंया निर्यात थगुने स्वयां २१ प्रतिशतं थहां वनाः ६३ गू करोड २७ गू लाख तकया जूगु दु ।
लिसें ऊनया ज्वलं २९ प्रतिशतं थहां वनाः थुगु आर्थिक दँय् ४० गू करोड ७९ गू लाख तकया निर्यात जूगु दु । टेक्सटाइलया ज्वलंत मध्यय् नं ढाका कापःया ज्वलंत दबलय् अप्वः निर्यात जूगु खँ महासंघया तथ्यांकय् उल्लेख यानातःगु दु ।
निर्यात जूगु ज्वलंत मध्ये गैर टेक्सटाइलपाखे पंथं दयेकातःगु ज्वलं सेरामिक्स धातु व मेमेगु ज्वलंया सामानया निर्यात कुहां वःगु दु । तर बेड्सया निर्यातय् १०२ प्रतिशतं थशां वंगु नं महासंघं धाःगु दु ।
अथे हे गैर टेक्सटाइलया ज्वलंत पाखे वहःया तिसा ज्वलंत धासा दशलय् अप्वः निर्यात जूगु खनेदु । वहःया तिसा ज्वलनय् थगुने स्वयां थुगु आर्थिक दँया न्हापांगु प्यलाया दुने ३३ गू करोड ४३ गू लाख बराबरया निर्यात जुल ।
