मनसुन लिबाःगुलिं सकभनं चिन्ता
येँ / (सन्ध्या टाइम्स) दक्षिण एशिया लागाय् थुगुसी तसकं हे मनसुन लिपा लानाच्वंगुलिं वा मवयाः थीथी देशय् च्वंपिं मनूत चिन्तित जुयाच्वंगु दु । अथें हे लःया मेमेगु श्रोत म्हो जुजुं वनाच्वंगु इलय् झन वा तकं मवःगुलिं मनूत आय्बुयाच्वंगु दु । दँय्दसं थुगु लागाय् वइगु वां जक लःया ७५ प्रतिशत मनसुनपाखें प्राप्त जुइगु खः । तर मनसुन शुरु जूगु हे निवाः दयेधुंकाः नं भारतया गुलिखे राज्यय् ५० प्रतिशत स्वयां म्हो जक वा वःगु विज्ञतय्सं धाःगु दु ।
भारतया मौसम विभाग प्रमुख वीपी यादवं बीबीसी नेपाली सेवालिसें खँल्हासें जुन महिना तक नं वाइ वइ वा मइगु खँ धाये मफइगु खँ कनादीगु दु ।
बंगलादेशय् नं थुगुसी तसकं हे म्हो जक वा वःगु खँ अनया अधिकारीतय्सं धाःगु दु । अनया मौसम विभागया छम्ह मौसमविद् शादेक आलमं वंगु वालय् बंगलादेशय् ८० प्रतिशत स्वयां म्हो जक वा वःगु व उकिं तःधंगु हे प्रभाव लाकूगु खँ कनादिल ।
थुगुसी हिन्द महासागरय् पूर्वपाखें मखुसें पश्चिमपाखें वायुया चाप अप्वया वनाच्वंगुलिं मनसुन कमजोर जूगु खँ विज्ञतय्सं धाःगु दु । अथे जुयाः मनसुनी सुपाँय् उत्तरपाखे स्वयाः वने मफुगुलिं नेपाःया थीथी थासय् आकासया भरय् च्वनेमाःगु वा पीगु ज्या फुक्कं प्रभावित जुयाच्वंगु दु ।
थगुने जूसा क्वचायेमाःगु वा पीगु ज्या थुगुसी धाःसा शुरु हे मजूगुलिं नं कृषकत वा बाली स्यनीगु खःला धइगु चिन्ताय् लानाच्वंगु दु । थुगुसी नेपालय् मनसुन शुरु जुइत निवाः लिपा लायेधुंकूगु दु । सरकारी मनसुनविद्तय्सं धाःसा याकनं हे मनसुन शुरु जुइगु भविष्यवाणी याःगु दु ।
