सुख्खापाखें वीरगाजवासीत नं प्रभावित

वीरगंज / ताः ई न्ह्यःनिसें जुयाच्वंगु सुख्खपाखें वीरगाजबासीत नं बांमलाक प्रभावित जुयाच्वंगु दु । देशय् बैज्ञानिक कृषि प्रणाली लागू यानाः देशयात आत्मनिर्भर यायेगु छुं नं नीति मदुगुलिं कूल जनसंख्याया लागिं न्यालायात जक नयेत गाक्क नेपालय् उत्पादन जुइगु खँ सीदुगु दु । भारतय् थें नेपालय् दच्छिया लागिं अन्न संचय यायेगु परिपाटी मदु । गुलिं प्रखर ब्यापारीतय्सं सुख्खाया कारणं अन्नया भाः थहां वनीगु जुल धकाः आः हे अन्न भण्डार यानाः कृत्रिम अभाव शुरु यायेगु तरखर यानाच्वंगु दु ।

उलि जुल नं बजार अनुगमन याइगु निकाय मौन जुयाच्वंगु दुसा उकिं यानाः उपभोक्तात नं खाद्यान्न बित्रेुतां कायम याःगु मूयात सहज रुपं स्वीकार यानाच्वंगु दु । उपभोक्ता आन्दोलनयात न्ह्याका वयाच्वंगु उपभोक्ता संघ संस्थात नं अप्वया वनाच्वंगु मूल्य वृद्धि खाद्यान्नया संकट व ताः ई तक सुख्खा जुयाः नं सुयां भचा हे चिउताः खनेमदु । हिमाल पहाड व तराईलय् नं कृषक जनतायात राहत बीमाःगु खँय् नेपाल सरकारं विशेष चिउताः तयेमाःगु खनेदु । मुहान व खुसिया लः तकं सुना वनेधुंकूगु दु । खुसिइ लः म्हो जूगुलिं जलविद्युत उत्पादनय् नं लिच्वः लानाच्वंगु दु ।

असारया दथुइ थ्यनेधुंकाः नं मनसुन वर्षा मजुइवं तसकं तान्वयाः मनूत हैरान जुयाच्वंगु दु ।

छम्हु नयाः छमुरी उत्पादन यायेगु इलय् नं सुम्क च्वनेमाःगु कारणं किसानत तसकं थाकुगु स्थितिइ थ्यनाच्वंगु दु ।

देय्न्यंकं सुख्खा जुयाः थुगुसी नं खाद्यान्न संकट वइगु खने दयेवं नेपाल सरकारं थुगुसी नं जाकि व छ्व केँ पिने निर्यात याये मदइ कथं प्रतिबन्ध तया बिउगु दु ।