भारतय् माओवादी विरुद्ध सैन्य कारवाही

भारतय् गतिविधि अप्वयेका हःपिं माओवादीयात नियन्त्रण यायेगु लागिं अनया सरकारी सेनां थःगु तीव्रता अप्वयेका हःगु दु । माओवादीयात भारतन्यंकं आतंकवादी संगठनया रुपय् घोषणा यासें उमित सखाप हे यायेगु लागिं सैन्य अभियान न्ह्याकूगु खः । थुकिं यानाः अन आपालं सेना व माओवादी छापामारत हताहत जूगु दुसा थ्व क्रम अझ अप्वया हे वनीगु संकेत पिहां वःगु दु ।

दक्षिण एसियाय् नेपालय् स्वयां न्हापा हे भारतय् माओवादीतय् छापामार गतिविधि शुरु जूगु खःसां छगू इलय् वनाः थ्व गतिविधि शुन्यया हे अवस्थाय् थ्यनेधुंकूगु खः । तर नेपालय् नेकपा माओवादी या गतिविधि अप्वया वनेवं उकिं हे प्रेरित जुयाः भारतय् तना हे वनेधुंकूपिं माओवादीत हानं छक्वः जुरुजारुं दना वःगु खः । नेपालय् ला माओवादीतय्सं दथुइ हे विद्रोह दिकाः सरकारलिसे वार्ता यानाः चुनावय् ब्वति काल । तर भारतय् धाःसा अज्याःगु वार्ता मजूगुलिं निगुलिं पुचः 'कि सित कि स्यात'या स्पिरिट ज्वनाः ल्वानाच्वंगु दु । खास यानाः श्रीलंकाय् दशकौं पुलांगु लिट्टेया युद्धयात सरकारी सेनां समाप्त हे जुइक अभियान न्ह्याकूगु कारणं यानाः नं भारत उत्साहित जुयाः थःगु देशया विद्रोहीतय् विरुद्ध तःधंगु सैन्य कारवाही याःगु जुइमाः । थुकी भारत गुलि सफल जुइगु खः व ला स्वये हे मानिगु खँ जुल । तर थुकिं नेपाःया माओवादीतय्त गुलि प्रभावित याइ व धाःसा मेगु कथंया चिउताःया विषय जुइफु । थौंकन्हय् माओवादी सत्ताय् मदु । अन दुने हानं विद्रोह यायेगु खँ पिहां वयाच्वंगु दु ।

भारतय् कारवाही शुरु जुइवं अनया माओवादीत नेपालय् वइगु नं सम्भावना दु । थ्व नेपाःया चिउताःया विषय खः ।

More Stories Like this