सरकारया विकल्प बारे बिचाः मयाये : सुजात

परराष्ट्रमन्त्री सुजाता कोइरालां माधव नेपालया नेतृत्वय् गठन जूगु गठबन्धन सरकारया विकल्पया बारे बिचाः मयायेत एकीकृत नेकपा (माओवादी)यात इनाप यानादीगु दु ।

कांग्रेस नेतृ सुजात कोइराला परराष्ट्र मन्त्री नियुक्त जुयादीगुलि पार्टीया दुजःतय्सं वयेकया सम्मानय् याःगु चियापान समारोहलय् पत्रकारत नाप खँल्हाबंला यानादिसें वयेकलं थ्व सरकार शान्ति प्रकृयायात तार्किक निष्कर्षय् थ्यंकेत व संविधान निर्माणया ज्या ईलय् क्वचायेकेत गठन जूगु सरकार खः धयादिल । वयेकलं शान्ति प्रकृया व संविधान निर्माण यायेगु ज्या क्वचायेका तीनि थ्व सरकारं बिधा काइगुलिं सरकारया विकल्पया बारे बिचाः मयायेत माओवादीयात इनाप यानादिल ।

वयेकलं दक्व पक्ष मिलेजुया ईलय् संविधान निर्माण यायेगु ज्या क्वचायेके माःगुलिं सहमति, सहकार्य व एकताया विकल्प मदु धयादिल ।