हत्याया विरोधय् शान्ति र्याली
येँया पुतलिसतकं अपहरण याना लिपा अपहरणकारीतय्सं स्याम्ह कालीमाटीया जुबिलियन्ट कलेजया विद्यार्थी ख्याती श्रेष्ठया हत्याया विरोधय् थौं शान्ति र्याली याःगु दु ।
शान्ति र्याली विद्यार्थी, शिक्षक, अभिभावक लगायत सर्वसाधारण जनताया ब्वति दुगु खः । र्याली बसन्तपुरय् थ्यंकाः शोकसभाय् परीणत जूगु खसा: र्यालीइ ब्वति कापिंसं दण्डहिनताया अन्त्यया माग याःगु ख: । र्याली हत्यारायात कडा कारवाहि यायेत माग यासें छुं ई महानगरीय प्रहरी परिसर घेराउ नं याःगु खः ।
विराटनगरया झिंगुदँया मृतक श्रेष्ठयात वंगु जेठ २२ गते येँया पुतलीसतकं अपहरणय् यानायंकूगु खः । अपहरणलिपा मुख्य अभियुक्त विरेन प्रधानं ख्यातीया विभत्स हत्या यानाः शरिर झिगू कुचा दयेकाः रानीबन, यल व चितवनया मुग्लीन नारायणगढ सतक खण्डय् वांछ्वःगु स्वीकार यायेधुंकूगु दु । अभियुक्तया हे बयानया आधारय् प्रहरीं ख्यातीया वांछ्वयातःगु फुक्क अंग लुइकेधुंकूगु दु । ख्याती हत्याकाण्डया मुख्य अभियुक्त विरेन प्रधान व मेम्ह अभियुक्त मेरिना शाक्य प्रहरी हिरासतय् तयातःगु दु ।
