प्रमाण पत्र तह खारेज याना: देय्या शिक्षायात ल्यूने घ्वायेगु षडयन्त्र : डा. भट्टराई
एकीकृत नेकपा (माओवादीया) वरिष्ठ नेता डा. बाबुराम भटराईं विश्वविद्यालय तहलं प्रमाण पत्र तह खारेज याना: देय्या शिक्षायात ल्यूने घ्वायेगु षडयन्त्र या:गु द्वपं बियादीगु दु । वय्कलं अग्रगमन व प्रतिगमनकारीत दथुइ ल्वापु जुयाच्वंगु इल्य् थज्याःगु निर्णयपाखें देय्यात प्रतिगमन पाखे यंकीगु खँ धयादीगु दु ।
त्रिभुवन विश्वविधालयं प्रविणता प्रमाणपत्र तह खारेज यायेत याःगु निर्णयया सम्बन्धय् बिहिवा: अखिल क्रान्तिकारीं येँय् याःगु अन्तरक्रियाय् न्वंवानादिसें डा. भट्टराईं गरिब दुःखी जनतायात शिक्षापाखें बिञ्चित यायेगु निंतिं प्रमाणपत्र तह खारेज याःगु धयादीगु दु । वयेकलं बरु देय्या प्रत्येक गांमय् प्रमाणपत्र तहया विज्ञान, मानविकि लगायतया संकायत संचालन यायेमाःगु धयादिल ।
अथेहे ज्याझ्वलय् न्वंवानादिसें अखिल क्रान्तिकारीया नायः लेखनाथ न्यौपानें गरिब जनताया काय् म्ह्यया विरुद्धया त्रिविं याःगु निर्णयया सतक मार्फत सशक्त आन्दोलन यायेगु ख्याच्वः बियादीगु दु ।
