स्वरोजगार पीडितपाखें सीडीओ घेराउ
ख्वप / (सन्ध्या टाइम्स) माओवादी सरकारं हःगु युवा स्वरोजगार कार्यक्रम अन्तर्गत वंगु असार १ गतेनिसें त्यासा इनेगु सुचं पित बिउगु खःसां आः तक नं उगु ज्या मयाःगुलिं ख्वपय् युवा तथा साना रोजगार पीडित संघ हे नीस्वनाः संघर्षया ज्याझ्वः पित बिउगु दु । उकिया न्हापांगु ज्याझ्वः कथं मंगलवाः ख्वपया सीडीओ ज्याकू व भक्तपुर उद्योग वाणिज्य संघया ज्याकू घेरे यानाः ज्ञापनपत्र बिउगु दु ।
उगु ज्ञापनपत्रय् युवा तथा साना रोजगार तुरुन्त लागू यायेमाःगु युवा तथा साना रोजगारया दां छवाःया दुने बीमाःगु नापं प्यंगू बुँदा दुथ्याकातःगु दु । संघर्ष समितिया अध्यक्ष छायाँदेवी थापां सरकारं त्यासा बी धाःगुलिं द्वलंद्वः दां खर्च यानाः उद्योग दर्ता याना तयेधुंकाःलि नं त्यासा मबिउगुलिं बाध्य जुयाः आन्दोलनय् कुहां वयेमाःगु खँ कनादिल । ज्ञापनपत्रय् किस्ता यानाः मखुसें एकमुष्ठ दां बीत नं माग यानातःगु दु ।
भक्तपुर उद्योग बाणिज्य संघं बिउगु जानकारी कथं जिल्लान्यंकं ४७९८ म्हेसिनं फारम भरे याःगु मध्यय् आः तक ३५६० म्हेस्यां संघपाखें तालिम कायेधुंकूगु दु । वंगु बैशाख ८ गतेनिसें ज्याझ्वलय् सहभागी जुइत फारम भरे याःिपंत शुरु जुयाच्वंगु तालिम आः नं न्ह्याना हे च्वंगु दनि ।
