मनू सीवं चाबहिली ताडेफोड
येँ / (सन्ध्या टाइम्स) बसया ठक्करं सीम्हेसिया छेँजःयात क्षतिपूर्ति बीमाःगु माग यासें स्थानीय वासिन्दां यानाच्वंगु प्रदर्शनया कारणं चाबही लागाय् थौं यातायात ठप्प जुयाच्वंगु दु । म्हिगः बहनी बा. २. ख. ९६० नम्बरया स्वय्म्भू यातायातया बसया ठक्करं घाःपाः जूम्ह दिपेन्द्र खनाल वासः यायेगु झ्वलय् मदुगु खः । स्थानीय जनतां थौं सुथय् स्वय्म्भू यातायातया निगः गाडी नं तोडफोड याना बिउगु दु । मित्रपार्क बौद्ध गौशाला महाराजगंज व सीता पाइला लगायतया लागाय् यातायात प्रभावित जुयाच्वंगु दु ।
थौं किपूमितय्सं बुंगद्यः सालीगु
यल / (सन्ध्या टाइम्स) बुंगद्यःया रथ थौं सालेत्यंगु दु । थौं थितंनिसें जावलाख्यः तक रथ साली । थौं किपूमितय्सं बाजं थानाः भजन म्ये हालाः उमिगु हे नेतृत्वय् द्यः सालीगु चलन दु । थौं जाउलाख्यलय् याः न्याःसा प्यन्हु लिपा भोटो क्यनीगु चलन कथं सनिवाः भोटो क्यनी ।
