कांग्रेसय् निगूगु पुस्तायात अवसर

नेपाली कांग्रेसया नकतिनि क्वचाःगु संसदीय दलया नेता ल्ययेगु चुनावय् निगूगु पुस्ताया नेता भाजु रामचन्द्र पौडेल त्यायेवं कांग्रेसया नेतृत्व पुलांगु पुस्तां न्हूगु पुस्तां कुहां वःगु महसुस याःगु दु । खतुं कांग्रेसय् पुलांगु पुस्ता धकाः सभापति गिरिजाप्रसाद कोइराला याकःचा हे बाहेक मेपिं नेता सुं मदयेधुंकल । उकिं कांग्रेस आः अथें हे नं निगूगु पुस्ताय् कुहां मवसें मगाःगु अवस्था दु । कोइरालाया स्वास्थ्यस्थिति देशया अवस्था व कांग्रेसं उकी म्हितेमाःगु भूमिकायात कयाः धायेगु खःसा कांग्रेसया नेतृत्व हस्तान्तरणया थ्व ज्या ई स्वयां यक्व हे लिउने लायेधुंकूगु दु । अय्नं लिबाक हे जूसां थ्व ज्या सम्पन्न जुल थुकियात हे बांलाः तायेकेमाःगु खनेदु ।

तर संसदीय दलया नेताय् पुस्ता हस्तान्तरण जूसां पूरा पार्टी हे न्हूगु पुस्ताय् कुहां वयेधुंकल धायेगु अवस्था धाःसा अझ नं मदुनि । पार्टीया मुख्य कमाण्ड अझ नं कोइरालाया हे ल्हातय् दनि । कोइराला लिपा पार्टीया नेतृत्व कब्जा यायेगु लागिं जुइगु धेंधेंबल्लाः आः स्वयां कडा व दुष्कर जुइगु खँय् शंका मदु । कांग्रेसय् निगूगु पुस्ताया नेतात थुलि ग्वाःग्वाः दयेधुंकल कि आः उपिं फुकस्यां स्थानया खोजी याइबलय् पार्टी दुने तःधंगु हे महाभारत जुइगु अनुमान अःपुक हे यायेफु । अय् जूगुलिं कन्हय् थुखेपाखे नं छुं समस्या मवयेमा धकाः आः हे माःगु व्यवस्थापन जूसा बांलाः । नेतृत्वयात लोकतान्त्रिक रुपं हस्तान्तरण यायेगु छगू बांलाःगु अवसर वइगु धइगु पार्टी महाधिवेशन जुइबलय् खः । तर कांग्रेसया महाधिवेशन धाःसा गबलय् जुइ धइगु हे ठेगान मदयेक लिहां लिहां वनाच्वंगु दु । पार्टीयात दुर्घटनां पनेगु खःसा थ्व प्रवृत्ति त्वःते हे माः ।

More Stories Like this