फ्रान्स व श्रीलंकाया राजदूतं प्रधानमन्त्री नापलात
नेपाःया निंतिं फ्रान्सया राजदूत गिल्स हेनरी व श्रीलंकाया राजदूत अमरलाला सुमिथ नाकान्दालां थौं प्रधानमन्त्री माधवकुमार नेपाल नापलानादीगु दु ।
बुधवाः फ्रान्सया राजदूत हेनरी नाप प्रधानमन्त्रीया ज्याकू सिंहदरवारय् खँल्हाबंला जूगु खः । खँल्हाबंलाया झ्वलय् राजदूत हेनरीं शान्ति प्रकृया, न्हूगु संविधान, दलत दथुइया सहकार्य आदि बारे च्यूता तयादीगु खः । अथेहे राजदूत हेनरी नापया खँल्हाबंलाय् प्रधानमन्त्री नेपालं शान्ति प्रकृयाय् अनमिनं महत्वपूर्ण भुमिका म्हितुगु धासेः नेपालय् अझ नं अनिमिनया आवश्यकता दुगु धयादिल ।
नापलाय्गु झ्वलय् राजदूत हेनरीं प्रधानमन्त्री नेपालयात फ्रान्सया प्रधानमन्त्रीं छ्वयाहः भिंतुनाः पौ लःल्हानादीगु खः ।
अथेहे बुधवाः श्रीलंकाया राजदूत नाकान्दाला नाप नेपाः व श्रीलंका दथुइ थीथी सम्झौता व दुइपक्षिय हितया विषयस खँल्हाबंला जूगु खः । नापं नेपाः व श्रीलंका दथुइ तप्यं हवाई उडान शुरु यायेगु व पर्यटन व्यवसाय अप्वयेकेगु बारे नं सहलह जूगु खः ।
राजदूत नाकान्दालां नं श्रीलंकाली राष्ट्रपितं छ्वया हःगु भिंतुना पौ प्रधानमन्त्रीयात लःल्हाःगु खः ।
