येँया थीथी थाय्या यातायात ठप्प

सवारी दुर्घटना जूगु घटनायात कयाः स्थानीवासीतय्सं याःगु प्रदर्शनं येँया चाबहिल, मित्रपार्क, बौद्ध, महारजगंज लगायतया थासय् बुधवाः सुथय् निसें यातायात अवरुद्ध जूगु दु ।

बसया ठक्करं सिम्हेसिया छेँजःयात क्षतिपूर्ति बीमाःगु व बस चालकयात कारबाही यायेमाःगु माग यासें स्थानीयवासीतय्सं प्रदर्शन यासें यातायात अवरुद्ध याःगु खः । प्रदर्शनकारीतय्सं स्वयम्भू यातायातया निगः बसय् नं तोडफोड याःगु दु । चाबहिलय् मंगलवाः सनिलय् बा. १. ख. ९६० नम्बर बसया ठक्कर येँय् भीमढुङय् च्वनिम्ह नीगुदँया दीपेन्द्र खनाल सीगु खः ।