ख्यातीया छ्यँ लुल
अपहरण लिपा हत्या याम्ह झिंगुदँया ख्याती श्रेष्डया छ्यँ येँया रानीबन जंगलय् बुधवाः लुइकूगु दु ।
येँय् प्रहरी प्रमुख एसपी नवराज सिलवालया कथं हत्याया अभियुक्त वीरेन श्रेष्ठ प्रधानया बयानया आधारय् बुधवा: सुथय् प्यता: ईलय् ख्यातीया छ्यँ छगू कार्टुन दुने तयातःगु अवस्थाय् रानीवनय् लुइकू खः । अभियुक्त प्रधानं थम्हं ख्यातीया म्ह व छ्यँ चानाः थीथी थासय् वाँछ्वयाःगु खँ स्वीकार यायेधुंकूगु दु । अथेहे प्रहरीं हत्याय् संलग्न जूगु द्वपंलय् ज्वंम्ह झिंखुदँया मेरीना शाक्या छेँय् नं फिरौती कथं काःगु निगू लाख तकाः ध्यबाः बरामद याःगु दु । प्रहरीं प्रधान व शाक्ययात ख्यातीयात हत्याया संलग्न जूगु धासें अनुसन्धान यानाच्वंगु दु । प्रहरी प्रमुख सिलवालया कथं छुं न्हि दुने हे अनुसन्धान सिधइगु खँ धयादीगु दु ।
ख्यातीयात जेठ २२ गते येँया पुतलिसतकं अपहरण याःगु खसाः वंगु आइतवाः नीति वया सीम्ह यलय् लुइकूगु खः ।
