सभासद्तपाखें न्ववाये धुंकाः ससंद अवरुद्ध
व्यवस्थापिका संसदया मंलगवाः च्वंगु बैठक नं कार्यसूचिइ दुहांमवंकं स्थगित जूगु दु । माओवादीं नागरिक सर्वोच्चताया ग्यारेन्टी मजूतल्ले व्यवस्थापिका संसदया कार्यतालिकाय् प्रवेश यायेमफइगु धासें थौंया बैठक बहिष्कार याःगु खः । बहिष्कार लिपाः संसदया बैठम असार ११ गते तकया निंतिं स्थगित याःगु दु ।
न्हापा थें माओवादीं थौंया संसद बहिष्कार यासां थीथी राजनीतिक दलाय नेतातय्त थःगु खँतय्गु ह्वता: ब्यूगु खः । बैठक माओवादी सभासद् भीमप्रसाद गौतमं नागरिक सर्वोच्चताया निंतिं माओवदी न्ह्यवलेनं ल्वानाच्वनीगु धयादिल ।
अथेहे व्यवस्थापिका संसदया बैठकय् कांग्रेसया सभासद् मोहन पाण्डे व एमालेया सभासद् रविन्द्र अधिकारीं नागरिक सर्वोच्चताया नामय् माओवादी देशय् आतंक ब्वलंका च्वंगु धासें सहमति व सहकार्यया राजनीति यायेत माओवादीयात इनाप यानादिल । मधेशी जनअधिकार फोरम (यादव पक्ष)या अध्यक्ष उपेन्द्र यादवं पार्टी पाखें कारवाही याम्ह विजयकुमार गच्छदारयात उपप्रधानमन्त्री देयेका माधवकुमार नेपालं लोकतन्त्र व संविधानया उपहास याःगु द्वपं बियादिल ।
व्यवस्थापिका बैठकय् राष्ट्रिय जनशक्ति पार्टीया सभासद् डा. प्रकाशचन्द्र लोहनी, नेकपा (संयुक्त)या चन्द्रदेव जोशी, नेकपा (माले)या तिलक बहादुर थापा मगर, नेमकिपाया सभासद सुनिल प्रजापति व नेपाली जनता दलया गायत्री साहं नं न्ववानादीगु खः ।
