ख्याती हत्या विरुद्ध थौं नं जाम
येँ / (सन्ध्या टाइम्स) अपहरण लिपा हत्या जूम्ह छात्रा मय्जु ख्याती श्रेष्ठया हत्यारायात ज्वनाः कडा कारवाही यायेमाः धइगु माग यासें थौं नं ख्याती ब्वनीगु कालिमाटीया जुबिलियन्ट कलेजया विद्यार्थी-तय्सं सतक जाम यानाः यातायात अवरुद्ध यात ।
उगु कलेजया विद्याथीतय्सं म्हिगः थें थौं नं सतकय् वयाः ब्यानर सहित फ्यतुनाः यातायात अवरुद्ध याना बिउगु खः । थुकिं यानाः थौं नं कालिमाटी, टेकु, ताहाचः, बल्खु आदि लागाय् यातायात ठप्प जुयाच्वंगु दु । उगु लागाया अवरोधं यानाः थौं राजधानीया मेमेगु लागाय् नं यातायात प्रभावित जुयाच्वंगु दु ।
हत्याया विरोधय् थौं देय्न्यंकंया प्लस टु कलेजत नं बन्द जुयाच्वंगु दु । प्रहरीं हत्याया द्वपनय् छगू इलय् ख्याती श्रेष्ठया अबुपिं हे बालं च्वनावंगु छेँया थुवाः एवं आदर्श विद्या सदनय् विज्ञान ब्वंकीम्ह पुलांम्ह शिक्षक विरेन श्रेष्ठ व उकुन्हु तिनि एसएलसी बिउम्ह मेरिना शाक्ययात ज्वनाः कारवाही न्ह्याकाच्वंगु दु । अनुसन्धान अझं जारी दनिगु खँ नं प्रहरीं धाःगु दु ।
