मन्दीं मानवीय संकट जुइफु : विश्व बैंक
येँ / (सन्ध्या टाइम्स) विश्वया विकासशील देय्या आर्थिक विकास थुगु दँय् १ दशमलव ६ प्रतिशतं तक कुहां वयेफइगु खँ विश्व बैंकं पिथंगु प्रतिवेदनय् न्ह्थनातःगु दु । थुकिया कारणं विश्वया लखौं मनूत गरिबीया शिकार जुइ फुगु खँय् नं बैंकं चिउताः प्वंकूगु दु ।
थ्व हे खँयात कयाः बैंकं वित्तीय संकटं यानाः विश्व गरिब देय्या निंतिं मानवीय संकट तकं जुइफुगु धासें ख्याच्वः तक बिउगु दु ।
जःलाखःला देय् चीन व भारतयात दुमथ्याकुसे विश्व बैंकं याःगु छगू अनुमान कथं विकासशील देशय् आर्थिक मन्दीं थुगु दँय् तःधंगु लिच्वः लाःगु खँ न्ह्यथंगु दु ।
अथे हे विकासशील देशय् जुइगु लगानीया संशाधनय् नं व्यापाक रुपं कमी वइगु खँ धाःगु दु । बैंकया कथं विकासशील देशय् विकासया गतिविधि अप्वयेकेत ग्वाहालि याइगु आपालं बैंक व वित्तीय संस्थात मन्दीया शिकार जुयाच्वंगु दु ।
