लागू वासः ज्वनेत अप्रेशन डोज
येँ / (सन्ध्या टाइम्स) पिनें लागू वासः हयाः येँय् मीगु गिरोहयात लक्षित यानाः प्रहरीं ुअप्रेशन डोजु नामं विशेष कारवाही शुरु याःगु दु । थ्व कारवाही अन्तर्गत आः तक च्याम्ह मनूयात ज्वनेधुंकूगु दुसा उपिंपाखें १ लाख ५ हजार दां मोबाइल ७ सेट व ६८८ ग्राम हिरोइन बरामद यायेधुंकूगु खँ लागू औषध नियन्त्रण कानून कार्यान्वयन इकाई न्हूगु बानेश्वरं धाःगु दु ।
थ्व इकाईया प्रहरी पुचलं वंगु असार ५ गते टिष्टुङ्ग-७ य् छेँ दुम्ह विरमान घलान र पर्सारया रंगपुर टाँडीइ छेँ दुम्ह प्रमिला चौधरीयात बल्खुं ५०० ग्राम हिरोइन सहित ज्वंगु खः ।
थ्व विशेष अप्रेशन अन्तर्गत रौतहट चन्द्रनिगाहपुर ५ व ६ या राजन कुमार काफ्ले व दिप वहादुर खड्का महोत्तरी जलेश्वरय् छेँ जुयाः यलया सानेपाय् च्वनीम्ह देवी साह महेन्द्रनगर-१ या गणेश गुरुङ्ग न्हू बानेश्वर थापागाउँया अभिषेक पौडेल काभ्रे वालिङ्गया डाँडाखर्कय् छेँ जुयाः येँया अनामनगरय् च्वनीम्ह ठूलो कान्छा तामाङ्गयात ज्वनातःगु दु । उपिं फुकसित थप अनुसन्धानया लागिं कारवाही न्ह्याकाच्वंगु दु ।
