गृह मन्त्रीजु, आः छिं छु धयादी ले ?

देय्या गृह मन्त्री जुइगु लागिं ला राजनीतिक पार्टीतय् दथुइ तःधंगु हे खिंचातानी जुइ तर गृह प्रशासन चले यायेगु ह्याउ धाःसा सुं हे पार्टीया सुं हे नेतायाके मदुगु हे जुयाच्वन । राजनीतिक पार्टीतय्सं गृह मन्त्रालय ताके याइगु धइगु देय्या गृह प्रशासन बांलाकेगु लागिं स्वयां नं मन्त्रालयया ल्याःचाः तयेम्वाःगु बजेट संकेत व प्रहरी प्रशासनया असीमित अधिकारया दुरुपयोग यायेत जक जुयाच्वन । थौं स्वयां १७ न्हु न्ह्यः राजनीतिक पार्टीतय् दथुइ गृह मन्त्रालय ल्हातय् लाकेगु लागिं धेंधेंबल्लाः जुयाच्वंगु हे इलय् राजधानीया पुतलिसतक थेंज्याःगु व्यस्त थासं छम्ह मिसा मचा अपहरित जुल । वया मांअबुपिंसं थः ल्यासेम्ह म्ह्याय् माला बिउ धकाः प्रहरी प्रशासनय् अनुनय यात तर प्रहरीयात देय्या गृह प्रशासन स्वयेगु सिबें नं न्हूम्ह गृह मन्त्री सु वइ धइगु खँय् अप्वः चिउताः दुगु जुयाच्वन । सरकार चले याईपंत देय्या गृह प्रशासन दुरुस्त यायेगु स्वयां नं गृह मन्त्रालय कब्जा यायेगु खँय् अप्वः रुची दुगु जुयाच्वन । गुकिं यानाः राजधानीं अपहरण जूम्ह छम्ह मिसा मचा मालेत १७ न्हु तक प्रहरी निकम्मा साबित जुल व अन्ततः वयागु लाश लुइधुंकाः तिनि अपराधीया 'लिक्क' थ्यनेत प्रहरी ताःलात । देशय् अपहरणया सवालय् जूगु थ्व न्हापांगु घटना मखु । थज्याःगु घटना न्हापा लिपा नं यक्व जुइधुंकल । तर गृह प्रशासनं अपहरित मनूया लाश लुइकाः परिवारयात लःल्हायेगु स्वयां अप्वः मेगु छुं ज्या यानाः क्यने फुगु मदु । ताःहाकः हे ल्वापु यानाः गृह मन्त्रालय ल्हातय् लाकूम्ह न्हूम्ह गृह मन्त्रीं आः थ्व सवालय् छु धयादी ? केवल श्रद्धांजलि हे जक प्वंकादी लाकि ल्वानाः ल्हातय् लाकूगु गृह मन्त्री पदया औचित्य नं साबित यानादी ?

More Stories Like this