टिकापुरय् माओवादी व प्रहरी दथुइ झडप, झिंछम्ह घाःपाः
उर्जा राज्यमन्त्री चन्द्रिसंह भट्टराईं टिकापुर नगरपरिषदया उल्लेज्या यायेगु झ्वलय् माओवादी कार्यकर्तातय्सं याःगु अवरोध यायेत स्वःगु ईलय् जूगु झडपय् लानाः झिंछम्ह घाःपाः जूगु दु । झडप नियन्त्रण यायेत प्रहरीं निगू राउण्ड अश्रु ग्यास नं केयेकूगु खः । टिकापुर इलाका प्रहरीया कथं झडपय् लानाः निम्ह सशस्त्र प्रहरी, स्वम्ह जनपद प्रहरी व खुम्ह माओवादी कार्यकर्तात घाःपाः जूगु दु । घाःपाः जुपिंत टिकापुर अस्पतालय् वासः याकातःगु दु ।
माओवादी कार्यकर्तातय्सं निर्वाचनय् बुम्हेसित प्रमुख अतिथि देयेके दइमखु धासें ज्याझ्वलय् अवरोध थंगु खः । माओवादी अवरोधया कारणं परिषदया उल्लेज्या यायेगु ज्याझ्वः लिछ्याःगु दु । अथेहे माओवादी कार्यकर्तातय्सं राज्यमन्त्री भट्टराईया गाडी नं तोडफोड याःगु दु । कैलालीया प्रहरी प्रमुख उत्तम सिंहया कथं आः अनया स्थिति नियन्त्रणय् वयेधुंकूगु दु ।
मन्त्री भट्टराई संविधान सभा निर्वाचनय् कैलाली क्षेत्र नम्बर ३ पाखें बूगु खः ।
