प्रचण्डया प्रतिवेदनय् टिप्पणी यायेगु ज्या जारी
एकीकृत नेकपा (माओवादी)या न्ह्यानाच्वंगु पोलिटब्यूरो बैठकय् अध्यक्ष पुष्पकमल दाहाल 'प्रचण्ड'या राजनीतिक प्रतिवेदनय् थौं नं दुजःतय्सं थःथःगु बीचाः प्वंकूगु दु ।
मंगलवाः न्ववापिं नेतात सीपि गजुरेल व पोष्टबहादुर बोगटीं जनविद्रोहया कार्यनीति देयेकाः न्ह्याःवनेमाःगु खँय् बः ब्यूगु दु । नेतातय्सं अध्यक्षया प्रतिवेदन सम्झौता परस्त जूगु धासें जनविद्रोह व जनआन्दोलनया विकल्प मदूगु खँ धाःगु दु ।
अथेहे नेतात गिरिराजमणि पोखरेल, देव गुरुङ व वर्षमान पुन 'अनन्तं' अध्यक्षया प्रतिवेदनयात समर्थन यासेः जनमुखी संविधान देयेके माःगुगु खँय् बः ब्यूगु दु । थौं सीपि गजुरेल, पोष्टबहादुर बोगटी, नेत्रबिक्रम चन्द, गिरिराजमणि पोखरेल, देव गुरुङ व वर्षमान पुन 'अनन्तं' अध्यक्ष प्रचण्डया प्रतिवेदनय् टिप्पणी यानादीगु खः ।
अध्यक्ष प्रचण्डं न्ह्यब्वःगु प्रतिवेदनय् माओवादी नेतृत्वया सरकार गठन यायेगु व जनमुखि संविधान निर्माण यायेमाःगु खँ न्ह्यथंनातःगु दु । बैठक बुधवाः झिंछताः त्याः ईलय् हाकनं च्वनीगु जूगु दु ।
