बजेट निर्माणय् सुझाव बीत कांग्रेसं कार्यदल गठन
नेपाली कांग्रेसं बजेट निर्माणय् सरकारयात सुझाव बीत स्वंगु दुजः दुगु कार्यदल गठन याःगु दु ।
सिंहदरवारय् च्वंगु संसदीय दलया ज्याकूथी च्वंगु संसदीय दलया बैठकय् बजेट निर्माणय् पार्टीया धारणा व सुझाव बीत केन्द्रीय दुजःत डा. रामशरण महत, डा. नारायण खड्का व दिपकुमार उपाध्याय दुथ्याःगु कार्यदल गठन याःगु दु ।
संसदीय दलया नेताय् रामचन्द्र पौडेल त्यायेधुंकाः न्हापांगु खुशी च्वंगु बैठकय् संसदीय दल कार्य समितिया बैठकं दलया उपनेता चयन यायेगु निर्णय नं याःगु दु । उपनेनाय् प्रकाशमान सिंहयात नियुक्त याइगु सम्भावना अप्वः दुगु खँ धाःगु दु । अथेहे प्रमुख सचेतक व सचेतक मेगू बैठकय् सहलह यानाः नियुक्ति यायेगु निर्णय याःगु दु ।
बैठक लिपाः संसदीया दलया नेता रामचन्द्र पौडेलं माधवकुमार नेपाल प्रधानमन्त्री जुइवं खाली जूगु संवैधानिक समितिया सभापतिइ कांग्रेसयात देयेमाःगु दाबी याःगु दु । कांग्रेसं उगु पदय् निलाम्बर आचार्यया नां सिफारिस यायेगु तयारी यानाच्वंगु दु ।
संसदीय दलया बैठक हाकनं कन्हय् च्वनीगु जूगु दु ।
