'संविधान निर्माण ज्याय् छुं अवरोध जूगु मदु'
सभामुख सुवाषचन्द्र नेम्वाङं राष्ट्रपतिया पलाः भिंकेमाःगु माग यानाः एकीकृत नेकपा (माओवादीं) व्यवस्थापिका संसदय् बैठक अवरोध यानाच्वंसां थुकीं संविधान निर्माण यायेगु ज्याय् छुं अवरोध मजूगु खँ धयादीगु दु ।
मंगलवाः सभामुखया ज्याकू सिंहदरवारय् अमेरिकी राजदूत न्यान्सी जे. पावेल नाप जूगु खँल्हाबंलाय् वयेकलं थ्व खँ धयादीगु खः । खँल्हाबंलाया झ्वलय् राजदूत पावेलं निरन्तर अवरुद्ध जुयाच्वंगु संसदं संविधान निर्माण यायेगु ज्याय् गज्याःगु लिच्वः लाइ धकाः न्यनादीगु न्ह्यसलय् सभामुख नेम्वाङं व्यवस्थापिका संसदया बैठकय् अवरोध जुयाच्वंगु खसां थुकी संविधान निर्माण यायेगु ज्याय् छुं अवरोध मजूगु स्पष्ट यानादीगु खः ।
खँल्हाबंलाय् राजदूत पावेलं संविधान निर्माण यायेगु ज्याय् अमेरिकाया पूर्ण सर्मथन दुगु व थुकी अमेरिकां आवश्यक ग्वहालि याइगु धयादिल ।
