सद्भावनां सरकारय् ब्वति मकाइगु : महत्तो
एमाले गठबन्धन सरकारय् सद्भावना पार्टीं ब्वति मकाइगु खँ सद्भावना पार्टी अध्यक्ष राजेन्द्र महत्तों धयादीगु दु ।
मंगलवाः येँय् रिपोटर्स क्लबय् जूगु ज्याझ्वलय् सरकार गठबन्धन संस्कृति विपरित न्ह्याः वनाच्वंगु धासें थःगु पार्टीं सरकारय् ब्वति मकाइगु खँ स्पष्ट यानादीगु दु । वयेकलं एमाले व कांग्रेसं शक्तिशालि दक्वं मन्त्रालय कयाः ल्यं दनीगु मन्त्रालय थःपिंत बीया गठबन्धन संस्कृतिया विपरित ज्या याःगु द्वपं बियादिसें सद्भावनां उकीयात स्वीकार याये मफइगु धयादिल ।
अध्यक्ष महत्तों सरकारय् ब्वति कायेगु बारे प्रधानमन्त्री माधवकुमार नेपाल नाप तक्वः हे खँल्हाबंला जुसां सहमति जुइ मफूगु खँ धयादीगु दु । सरकारय् ब्वति मकासां सरकारयात ब्यूगु समर्थन धाःसा लितमकाइगु धयादिल । अथेहे वयेकलं सद्भावनाया कारणं मधेशवादी दलत सरकारय् वनेमफूगु खँ निराधार जूगु धयादिल ।
