हत्याया विरोधय् थौं देयन्यंकया उच्च मावि बन्द
जुबिलियन कजेजय् झिंनिगु तिगंमय् ब्वनाच्वंम्ह ख्याति श्रेष्ठया अपहरण लिपाः हत्या याःगु विरोधय् मंगलवाः देयन्यंकया उच्च मावि बन्द जूगु दु । एसोसियसन फर प्राइभेट एजुकेशन इन्स्टिच्युसन (अपीनं) आव्हान याःगु बन्दं देयन्यंकया थ्यंमथ्यं निद्वं उच्च माविया पठनपाठन ठप्प जूगु दु । बन्दय् प्याब्सन, एन-प्याब्सनय् लगायता संस्थां नं ऐक्यबद्धता प्वंकूगु दु ।
अथेहे हत्या विरोध यासें स्थानीयबासितय्सं थौं सुथंनिसें कालिमाटी क्षेत्रय् प्रदर्शन याःगु दु । प्रदर्शनकारीतय्सं हत्यारायात कडा कारवाही यायेमा:गु माग या:गु दु । प्रदर्शनया कारणं कालिमाटी टेकू, सोल्टि मोड, त्रिपुरश्वर, कुलेश्वर, बल्खु लगायत क्षेत्रय् सवारीसाधन आगमन प्रभावित जूगु दु ।
झिंगुदँया श्रेष्ठया जेठ २२ गते पुतलिसतकं अपहरण याःगु खसाः अपहरण जूगु झिंन्ह्यन्हु लिपा श्रेष्ठया सिम्ह आइतवाः यलय् लूगु खः । श्रेष्ठया हत्याय् संलग्न जुपिं दाजिर्लिङ छेँ जुयाः येँय् च्वनाच्वंम्ह पीनिदँया वीरेन श्रेष्ठ प्रधान व न्हू बजाया झिंखुदँया मेरिना शाक्ययात सोमवाः प्रहरीं सार्वजनिक याःगु दु ।
