कांग्रेस नेतात भोट फ्वनेत ब्वाँ जुल
येँ / (सन्ध्या टाइम्स) कांग्रेसय् संसदीय दलया नेता ल्ययेगु निंतिं कन्हय् जुइगु चुनावय् मत फ्वनेगु ज्या थिनंनिसें न्ह्याःगु दु । कांग्रेसया वरिष्ठ नेता शेरबहादुर देउवा उपसभापति रामचन्द्र पौडेल महामन्त्री कुलबहादुर गुरुङ व सुप्रभा घिमिरेपिंसं थौं सुथंनिसें सभासद्तलिसे खँल्हाबल्हा यायेगु लिसें थःपिंत भोट बीत इनाप यासें ब्वाँय् जुयाच्वंगु दु ।
थ्वहे झ्वलय् सीदु कथं पौडेल गुरुङ व घिमिरें थःपिनि उम्मेदवारी घोषणा यायेधुंकूगु दुसा देउवां धाःसा पार्टी सभापति कोइरालां समर्थन यात धाःसा जक उम्मेदवारी बीगु मनस्थिति दयेकाच्वंगु दु ।
उखे सूत्रं धाःसा देउवाया उम्मेदवारीयात कोइरालां समर्थन याइगु खँ धाःगु दु । कोइरालाया म्ह्याय्या नेतृत्वय् सरकारय् वनेगुली देउवां ग्वाहालि याःगुलिं कोइरालां नं देउवायात समर्थन यायेत्यंगु खँ नं सूत्रं धाःगु दु ।
उखे छुं नेतातय्सं धाःसा सभापति कोइराला हे संसदीय दलया नेता जुइमाः धासें कोइरालायात दवाव बियाच्वंगु दु ।
