सार्वजनिक साधनय् पंछि मतयेत इनाप
येँ / (सन्ध्या टाइम्स) स्थानीय प्रहरी प्रशासनं यात्रुत च्वनीगु स्थानीय सवारी साधनय् पंछि व पंछिजन्य वस्तु मल्ह्ययेत कडा आदेश जारी याःगु दु । झापाय् स्थानीय खाया माध्यमं हे बर्डफ्लु खने दुगुलिं अनाधिकृत स्थानीय खात मल्ह्ययेत चालकतय्त इनाप याःगु खः । काभ्रे सिन्धुपाल्चोक रामेछाप नापं थीथी जिल्लाय् वनीगु खा फुक्कं ख्वपं हे वनाच्वंगुलिं सार्वजनिक सवारी साधनय् खा मतयेत इनाप याःगु खः ।
ख्वपयात खा व्यवसायय् नेपालय् हे निगूगु प्रमुख जिल्ला कथं कयातःगु दु । अथे जुयाः यदि बर्डफ्लू वल धाःसा न्हापां स्थानीय मनूत हे शिकार जुइफुगुलिं थुकथं कडा यायेमाःगु खँ ख्वपया प्रमुख जिल्ला अधिकारी कमलमणि काफ्लें कनादिल । आः सार्वजनिक साधनय् खा तयाः मीगु ज्या याःगु सिल धाःसा खा नष्ट यायेगु खँ धाःगु दु ।
खा मीगु व ल्ह्ययेगु ज्याय् पंगः वःगुया लिसें ख्वपय् ख्येंया भाः नं थहां वनाच्वंगु दु । कुखुरा पालक व्यवसायी संघं थथे खाया ख्येंया भाः थकयाः आः छगःया च्यातका याःगु दु । थ्व ल्याखं आः ख्यें प्रति क्रेट २१५ तका थ्यनाच्वंगु दु । खाया ख्येंया भाः क्वःछीगु समितिया बैठकं उगु निर्णय याःगु खँ कुखुरा व्यवसायी संघं धाःगु दु । समितिया संयोजक सुमन सुवालं मेगु महिनाय् ख्येंया भाः अझ थहां वनेफुगु खँ धाःगु दु ।
