बांलाः मय्जुया शुभ मुहर्त
येँ / (सन्ध्या टाइम्स) दक्षिणकाली मुभिज प्रा.लि.या न्हापांगु नेपालभाषाया संकिपा 'बांलाः मय्जु'या इमेज च्यानलया प्रबन्धक रघुवीरभक्त मानन्धरं क्ल्यापिङ यानाः व नेवाः जागरण माचया संयोजक सुजीव बज्राचार्यं क्यामेराया स्वीच अन यानाः व नेवाः जागरण संकिपा माचया विजयरत्न तुलाधरं नैक्या तछ्यानाः शुभमुर्हुत यानादिल ।
पर्यटन बोर्डय् जूगु ज्याझ्वलय् सिलु संकिपाया नायः जय श्रेष्ठं लसकुस यानादीगु खःसा मूपाहां मानन्धर व वरिष्ठ गायक भृगुराम श्रेष्ठ त्वाःदेवाय् मत च्याकाः उलेज्या यानादीगु खः ।
थुगु संकिपाय् जय श्रेष्ठ, मेलिना मानन्धर, भिन्तुना जोशी, गौतमरत्न तुलाधर, हृदयप्रसाद मिश्र, सविन शाक्य, नगिना जोशी, सरस्वती मानन्धर लगायतयापिंसं अभिनय यानादीत्यंगु दु । संकिपाया निर्देशक पवन जोशी खःसा नृत्य निर्देशन भूवन श्रेष्ठ संगीत गोविन्द ह्यूमत छायांकन श्याम रायमाझी म्ये पवन जोशी व शैलेश शाक्य खःसा थुगु संकिपाय् रिमा गुरुङ, प्रवेश शाक्य, सतिस महर्जन, रिता महर्जन संगीता शाक्य राजेन्द्र महर्जन पूर्ण शाहीपिसं म्ये हालादीगुखः ।
कुल २० लाख लागतया उगु संकिपाया सुटिङ थिनंनिसें किपुली न्ह्याइ । निर्माणपक्षया कथं लच्छिया दुने सुटिङ क्वचायेकेगु तयारी जुयाच्वंगु दु ।
ज्याझ्वलय् पाहां कथं माओवादीया सभासद् दिलीप महर्जन, नांजाःम्ह कलाकार रविन्द्र खड्का, सिलु संकिपाया निर्माता प्रेम बानियाया काय भाजु पद्म बानियापिं झायादीगु खः ।
