गृहय् जुयाच्वंगु दावी व असुरक्षित येँदेय्

शक्तिशाली गृह मन्त्रालय सुयागु ल्हाती लाइ धकाः राजनीतिक पार्टीतय् दथुइ खिंचातानी जुयाच्वंगु हे इलय् येँय् शान्ति सुरक्षायात हाथ्या बी कथंया निगू ततःधंगु घटना जुल । छगू स्कूल वनाच्वंम्ह छम्ह मचायात लँय् हे निम्ह मोटरसाइकल चालकतय्सं अपहरण याना यंकल । यद्यपि भाग्यं सर्वसाधारण जनताया साहसं यानाः मचायात बचे यायेत सफल जुल । मेगु म्हिगः तिनि मोटरसाइकल गयाः वनाच्वंम्ह छम्ह मनूयात लँय् हे पनाः पेस्तोल क्यनाः वयाके च्वंगु १५ लाख तका दां न्हिनय् हे लुटे यानाः यंकल । थुकी धाःसा लुटेरातय्त ज्वने फुगु मदुनि ।

राजधानीइ नकतिनि जूगु थ्व निगू घटनां थ्व लागाया शान्ति सुरक्षा गुलि बांमलाये धुंकल धइगु खँयात बांलाक हे उला बिउगु दु । शान्ति सुरक्षा कायम यायेगु जिम्मा गृह मन्त्रालययागु खः । देशय् गृह मन्त्रालय गुगु पार्टीया भागय् लाइ धकाः तानातान जुयाच्वंगु इलय् लाक्क थ्व घटना जूगु दु । वास्तवय् राजनीतिक खिंचातानीया कारणं देशय् शान्ति सुरक्षा लगायतया अनेक समस्या पिहां वयाच्वंगु दु धइगु खँ नं थुकिं क्यं । गृह मन्त्री जुइगु लागिं राजनीतिक पार्टीतय् दथुइ हानथाप जुयाच्वंगु स्वयेबलय् थुपिं देशय् पूर्ण रुपं हे शान्ति सुरक्षा कायम यायेगु जिम्मेवारी कायेत सना जूपिं थें खने दु । तर वास्तवय् थुमिसं देशय् धाथें शान्ति सुरक्षा कायम यायेत थ्व धेंधेंबल्लाः यानाच्वंगु खः लाकि गृह मन्त्रालयया दुरुपयोग यानाः जिक्व फाइदा कायेत स्वयाच्वंगु खः थ्व खँ आः वइगु इलं पुष्टि या हे याइ । नेतातय्सं गृहय् यानाच्वंगु दावी अन्य लबः कायेत मखु शान्ति सुरक्षाया लािगं हे खः धकाः पुष्टि यानाः क्यने फयेकेमाः ।

More Stories Like this