मओवादी हिमी चायेकीगु ज्या

प्रधानसेनापति रुक्मांगद कटवालयात टिके यायेगु लागिं राष्ट्रपति डा. रामवरण यादवं ल्ह्वनादीगु पलाःयात वर्तमान सरकारं अनुमोदन याःगु विरोधय् माओवादीं देय्न्यंकं आन्दोलनया बिगुल पूगु दु । थ्व झ्वलय् उमिसं म्हिगः राजधानी येँ लगायत देय्न्यंकंया सरकारी ज्याकू पिने धर्ना बियाः कर्मचारीयात तकं दुत मछ्वसे निघौया लागिं सरकार हे ठप्प याना बिल । थ्व धर्ना ज्याझ्वलं यानाः राजधानीया यातायात जक अस्तव्यस्त जूगु मखु सरकारयात नं गुलिखे ज्या याये मफइगु अवस्थाय् थ्यंका बिल । माओवादीं राष्ट्रपतिया पलाः सच्चे मयाःतले हे थज्याःगु आन्दोलन यानाच्वनेगु धकाः ख्याच्वः बिउगुलिं आः देय् ताःहाकः हे हानं छक्वः अस्तव्यस्तताय् प्रवेश जुइगु संकेत बिउगु दु ।

वर्तमान सरकारं आवंलि हरेक ज्या राष्ट्रिय सहमति दयेकाः जक यायेगु धकाः उकुन्हु घोषणा याःगु खः । तर पूर्ववर्ती सरकारं यानातःगु निर्णययात तकं छसः न्यनेगु ज्या समेत मयासे पुइकेगु ज्या थ्व सरकारं यात । थुकिं यानाः आः सरकार व विपक्षी दथुइ सुमधुर स्वापू स्वयां नं कठोर सम्बन्ध कायम जू वनीगु निश्चित जूवंगु दु ।

आः थःपिनि माग पूवंकेगु लालिं धकाः माओवादीं गुगु ज्याझ्वःत याइ उकिं सरकारयात मिछंका बीगु ला स्वाभाविक हे जुल लिसें थ्व तनावं एमाले व माओवादी दथुया ल्वापुयात नं अझ तब्याका बी । एमाले व माओवादी थेंज्याःगु निगू वाम पार्टीया ल्वापुपाखें थःत हे फाइदा जुइगु जूगुलिं कांग्रेसं थुकी फयांफछि एमालेयात न्ह्यःने हयेगु ज्या यानाच्वंगु दु । एमाले स्वयां तःधंगु पार्टी माओवादीं याइगु थ्व संघर्षय् कांग्रेस छखे लीगु सम्भावना यक्व दु ।

More Stories Like this