अन्नपूर्ण पोष्ट न्हिपौया छापाखानाय् तोडफोड

येँया कालिमाटी स्थित जुविलियन्ट कलेजय् ब्वनिम्ह ख्याती श्रेष्ठया हत्याया समाचारय् न्ह्यथनातःगु छगू विषयप्रति आपत्ति क्यंसें स्थानीयबासींतय्सं अन्नपूर्ण पोष्ट न्हिपौया छापाखाना तोडफोड या:गु दु ।

स्थानीयबासींतय्सं न्हिपौया छापाखाना तोडफोड यायेगु नापं उगु न्हिपौया छुं प्रति च्याकूगु दु । उगु न्हिपौलय् प्रकाशित हत्या सम्बन्धी समाचारय् 'प्रहरीं यलया बुङगमती स्थित छखा: छेँ पाखें छम्ह ल्यासेया म्हया गिंड बरामद याःगु धइगु समाचारप्रति स्थानीयबासीं आपत्ति प्वंकूगु खः । उमिसं उगु समाचार स्थानीयबासीयात फसय् यायेगु उद्देश्यं प्रेरित जूगु नं दावी याःगु दु ।

स्थानीयबासीतय्सं अन्नपूर्ण पोष्ट न्हिपौया सैंबुस्थित छापाखाना तोडफोड समेत याःगु दु । करिब न्यासःया ल्याखय् वःपिं बुङमतिबासीया आक्रमणय् लाना: ज्याकुथीइ दुगु प्रेस मेसिनय् क्षति जूगु हिमालयन टाइम्सया प्रकाशन संस्था आप्का हाउसं जानकारी ब्यूगु दु । अथेहे प्रहरी व स्थानीयबासी दथुइ छघौतक झडप जूगु खः । स्थितियात नियन्त्रणय् कायेगु भुवलय् प्रहरीं अन छगू दर्जन अश्रु ग्याँस कयेकूगु खः । झडपय् लाना: न्याम्ह स्थानीयबासी घाःपाः जूगु दु । प्रहरीया कठिपाखें एबीसी टेलिभिजनलिसे आबद्ध पत्रकार मिनाल पाण्डे नं सामान्य घाःपाः जूगु दु ।