सभासदतय्सं विकास प्रशासनयात चुस्त यायेत सरकारयात सुझाव
नेकपा (एमाले)या सभासदतय्सं विकास प्रशासनयात चुस्त यायेत सरकारयात सुझाव ब्यूगु दु ।
सोमवा: च्वंगु एमाले संसदीय दलया बैठकय् बजेट तथा नीति ज्याझ्व: सम्बन्धय् पार्टीयात सुझाव बीत अर्थविद् व सभासद डा. विजय पौडेलया कजिसुइ गठित कार्यदलं अर्थमन्त्री सुरेन्द्र पाण्डेयात उगु सुझाव ब्यूगु खः । कार्यदलया प्रतिवेदनय् छगू बिकास क्षेत्रय् छगू बृहत योजना लाइकथं थ्वहे दँनिसें न्यागू बिकास क्षेत्रय् ज्या न्ह्याकेत सरकारयात सुझाव ब्यूगु दु ।
बैठकय् एमाले सभासद्तय्सं नेपाल-भारत सीमाय् छगू किलोमिटरया दुरीइ सीमा सुरक्षा पोष्ट तयेमाःगु सुझाव नं ब्यूगु दु । उमिसं शिक्षा, स्वास्थ्य, स्थानीय विकास लगायत गुंगू खँयात प्राथमिकता बीत नं सरकारयात सुझाव ब्यूगु दु ।
नीतिगत व योजनागत यानाः निगू ब्वय् विभाजित प्रतिवेदन बजेटय् बांलाःगु योजना दयेकूसां नं कार्यान्वयन सामान्य जुयाः अपेक्षित प्रगति जुइमफइगु धासें सरकारया ध्यानाकर्षण याःगु खः ।
