मधेशवादी दलतय्सं थौं नं सरकारय् वनिपिनी नां ल्यय् मफुत
मधेसी जनअधिकार फोरम व तराई मधेस लोकतान्त्रिक पार्टीं सरकारय् ब्वति काइपिं थः दुजःतय्गु नां सोमवा: नं प्रधानमन्त्रीयात लःल्हाये मफुत ।
फोरम दुनेया विवाद लिपा नेता शरदिसंह भण्डारी व मृगेन्द्रकुमार सिंह यादवयात थौं सपथ याकेगु विजयकुमार गच्छदारया कुतः नं विफल जूगु दु । फुक्क मन्त्रीतय्त छक्वलं सपथ याकेत गच्छदारयात दवाव अप्वयेवं थौं वय्कःपिं निम्हसित नं सपथ याकेमफूगु ख: । सत्ता भागबण्डा कथं फोरमयात पर्यटन, कृषि व महिला बालबालिका तथा समाजकल्याण मन्त्रालय लाःगु दु ।
अथेहे स्वम्ह मन्त्री व निम्ह राज्यमन्त्री दुगु तराई मधेस लोकतान्त्रिक पार्टीं नं थौं हे मन्त्रीतय्गु नां बीगु धयातःसां नं व सम्भव जुइमफुत । तमलोपायात शिक्षा, उद्योग व युवा तथा खेलकुद मन्त्रालय ला:गु दुसा: उपिं मन्त्रालय मध्ये छु नं निगू राज्य मन्त्रालय कायेगु सहमति जूगु ख: ।
थःपिंसं माग याक्वः मन्त्रालय मदयेवं सद्भावना पार्टी धाःसा तत्काल सरकारय् ब्वति मकायेगु थ्व स्वयां न्ह्यः हे पार्टीया नायः राजेन्द्र महतों स्पष्ट यानादीगु खः । मधेशवादी दलतय्सं सरकारय् ब्वति काइपिनिगु नां बिइमफयाः प्रधानमन्त्री ल्यःगु लच्छि दयेधुंकूसां नं सरकारं पूर्णता कायेफुगु मदुनि ।
