कांग्रेसय् महाधिवेशनया माग
नेपाली कांग्रेसया केन्द्रीय दुजःतय्सं पार्टीया झिंनिक्वःगु महाधिवेशनया मिति क्वछीत नेतृत्वनाप माग याःगु दु ।
कांग्रेस पार्टी ज्याकू सानेपाय् सोमवाः च्वंगु केन्द्रीय कार्यसमितिया बैठकं न्ववापिं अधिकांश केन्द्रीय दुजःतय्सं पार्टी महाधिवेशनया माग याःगु खः । पार्टीया विधान कथं थ्वहे भदौ दुने महाधिवेशन जुइमाःगु प्रावधान दु ।
अथेहे नेपाली कांग्रेसं संविधान निर्माण व सरकारय् पार्टीया भूमिकायात सशक्त यायेगु निर्णय याःगु दु । बैठकं पार्टी सुदृढीकरणयात नं लिसलिसे न्ह्यःने न्ह्याकेगु निर्णय याःगु खँ कांग्रेस महामन्त्री बिमलेन्द्र निधिं जानकारी बियादीगु दु ।
बैठकय् आपालं केन्द्रीय दुजःत पार्टी सभापति गिरिजाप्रसाद कोइरालाया निर्देशन कथं मनमुटाव मतसे पार्टीयात न्ह्यःने न्ह्याकेत सहमत जूगु खँ नं निधिं धयादीगु दु ।
अथेहे बैठकं सीमा समस्या समाधानया निंतिं कुटनीतिक पहल यायेत सरकारयात इनाप यायेगु समेत निर्णय याःगु दु ।
अथेहे बैठकय् पार्टी विधान संशोधन यायेगु बारे नं सहलह जूगु खः । पार्टी विधान संशोधन समितिं तयार याःगु संशोधन विधानय् केन्द्रीय समितिया ७५ दुजःत जिल्ला पाखें हे ल्ययाः वयेमाःगु व्यवस्था यानातःगु दु । अथेहे कार्यसम्पादन समितियात समावेशी देयेकेत थप १५ निसेः २० दुजःत मनोनित यायेफइगु व्यवस्था नं यानातःगु दु ।
तत्कालीन नेपाली कांग्रेस प्रजातान्त्रिक लिसे नेपाली कांग्रेसया एकतालिपा उगु विधान संसोधन जुइफुगु मदुनि ।
सुजाता कोइरालाया नेतृत्वय् पार्टीयात सरकारय् ब्वति कायेकेगु पार्टी सभापति गिरिजाप्रसाद कोइरालाया निर्णयप्रति रुष्ट कार्यवहाक सभापति सुशील कोइरालाया इनापय् सःतूगु बैठकबारे सभापति कोइरालायात टेलिफोन मार्फत जानकारी ब्यूगु खः ।
