एमाले व माओवादी बैठक बिना निष्कर्ष क्वचाल
सदन सुचारु यायेगु विषयस एकीकृत नेकपा (माओवादी) व नेकपा (एमाले) दथुइ जूगु बैठकं छु नं निष्कर्ष पिकायेफ्येवं बिना निष्कर्ष क्वचा:गु दु ।
माओवादी संसदीय दलया ज्याकु सिंहदरवारय् जूगु सहलहलय् माओवादी नायः प्रचण्डं सदन सुचारु यायेगु खँ प्रधानमन्त्रीं सदनय् याइगु सम्बोधनया निरभर जुइगु धायेवं छु नं निष्कर्ष वयेमफुगु खः । अथेखसां बैठक लिपा: संचारकर्मीत नाप खँल्हासें प्रधानमन्त्रीया राजनीतिक सल्लाहाकार व एमाले नेता रघुजी पन्तं बैठक सकारात्मक जूगु धयादिल ।
बैठकय् माओवादी नायः प्रचण्ड, एमाले नायः झलनाथ खना, एमाले वरिष्ठ नेता एवं प्रधानमन्त्री माधवकुमार नेपाल लगायत नेतातय्सं उगु बैठकय् ब्वति का:गु खः । बैठक कन्हय् हाकनं च्वनीगु जानकारी ब्यूगु दु ।
स्वंगू दलया बैठक नं बिना निष्कर्ष क्वचाल
थ्व स्वयां न्ह्यः च्वंगु माओवादी, काग्रेंस व एमाले दथुइया संयुक्त बैठक धाःसा सदन सुचारु याकेगु बिषयसं सकारात्मक जूगु नेतातय्सं जानकारी ब्यूगु ख: । प्रधानमन्त्री माधव कुमार नेपालं नागरिक सर्वोच्चताया विषययात कःघानाः सदनय् सम्बोधन याःसा माओवादीं सदन सुचारु यायेगु खँ धा:गु ख: ।
राष्ट्रपतिया असंवैधानिक पला:या विरोध यासें माओवादीं अवरुद्ध याना: वयाच्वंगु सदन सुचारु यायेगु विषयस थौं स्वंगू तःधंगु दलया शिर्ष नेतृत्व दथुइ जूगु सहलहलय् माओवादीं प्रधानमन्त्रीं सदनय् सम्बोधन यायेमाःगु अडान का:गु ख: ।
सिंहदरवारय् स्थित माओवादी सविधानसभा दलया ज्याकुथीइ जूगु सहलह सकारात्मक जूगु खँ बैठक लिपा माओवादी संविधानसभा दलया प्रमुख सचेतक पोष्टबहादुर बोगटी 'दिवाकरं' जानकारी बियादिल । अथेहे बैठक पाखें पिहाँझायादिसें माओवादी नायः पुष्पकमल दाहाल 'प्रचण्डं' प्रधानमन्त्रीं राष्ट्रपतिया असंवैधानिक पला:या विषय कःघानाः सदनय् सम्बोधन यायेगु प्रतिबद्धता क्यंसा थःपिंसं सदन सुचारु याकेबीगु जानकारी बियादीगु ख: ।
बैठक जुयाच्वंगु इलय् हे पिहांझाम्ह नेपाली कांग्रेस संसदीय दलया नेता रामचन्द्र पौडेलं माओवादीं सदनय् दर्ता याःगु संकल्प प्रस्ताव बारे सहलह जुइमफइगु खँ बैठकय् थःम्हं तया:गु जानकारी बियादिल । नापं नागरिक सर्वोच्चताया विषययात कःघानाः प्रधानमन्त्रीं सदनय् सम्बोधन यायेमाः धकाः माओवादीं तःगु प्रस्तावय् नं थःपिनिगु असहमति दुगु पौडेलं पत्रकारतय्त जानकारी बियादिल ।
अथेहे बैठकलिपा साचारकर्मीलिसे खँल्हाबल्हां यानादिसें गृहमन्त्री वा एमाले नेता भीम रावलं व्यवस्थापिकाया गतिरोध अन्त्य यायेत फुक्क दलत एकमत जूगु व कन्हय्तक सदन सुचारु जुइफुगु संकेत यानादीगु दु ।
बैठकय् माओवादीयापाखें नायः पुष्पकमल दाहाल 'प्रचण्ड', नेता डा. बाबुराम भट्टराई व नारायणकाजी श्रेष्ठ 'प्रकाश', एमालेपाखें नायः झलनाथ खनाल व गृहमन्त्री भीम रावलया ब्वति दुगु खसा: कांग्रेसपाखें संसदीय दलया नेता रामचन्द्र पौडेल व महामन्त्री विमलेन्द्र नीधि पिनिगु ब्वति दुगु खः ।
राष्ट्रपतिया असंवैधानिक पला:या विरोधय् माओवादीं ताःहाकःगु ईलंनिसें सदन अवरोध यानाः वयाच्वंगु खः ।
