'बाखं दबू' पितब्वज्या जुल
यें (सन्ध्या टाइम्स) /नेपालभाषा साहित्यय् बाखं विधा मोतिलक्ष्मी उपासिकां न्ह्याकूगु इतिहास अथेहे ७० दँ दयेधुंकल । अनंनिसें थौंतक थ्व भाषाय् बाखं च्वइपिं च्वमिपिं नं अथेहे उलि हे ल्याखय् दुगु खँ नांजाःम्ह समालोचक माधवलाल कर्माचार्यं धयादीगु दु । बाखं दबूया ग्वसालय् सनिवाः थिमिया आखाछेँय् जूगु 'बाखं दबू' लसतापौ पितब्वज्या यानादिसें वय्कलं उगु खँ धयादीगु खः । दबुलिं स्वनिगलं पिने हेटौंडाय् याःगु बाखं गोष्ठीइ झिंच्याम्ह बाखं च्वमिपिंसं पाठ याःगु बाखंमुनाः उगु लसतापौ पिथंगु खः ।
गणेशराम लाछिं लसकुस यानाः न्ह्याःगु ज्याझ्वलय् तिलकप्रकाश कायस्थ ख्वप, केदार 'सितु' यल, येँय्या मोतिलक्ष्मी शाक्य, लक्ष्मण राजवंशी व मथुरा साय्मिपिंसं बाखं ब्वनाः न्यंकादिल । बाखंया बारे अन्तरक्रिया नं जूगु खःसा थुकी राजा शाक्य अगिब बनेपाली विमल ताम्रकार पुष्पबहादुर चित्रकार गोविन्दमान मास्के व गम्भीरमान मास्केपिंसं ब्वति कयादीगु खः । पितब्वज्या जूगु लसतापौया बाखं ज्याझ्वलय् ब्वंगु बाखं नापं नेपालभाषाया बाखंया थीथी पक्षयात मूपाहां माधवलाल कर्माचार्यं दुग्यंक समालोचना यानादिल । ज्याझ्वः दबूया नायः लक्ष्मण राजवंशीया सभापतित्वय् जूगु खः ।
