तेश्रो लिंगी अन्तरक्रिया
ख्वप (सन्ध्या टाइम्स) / समाजय् मिसा व मिजं बाहेक तेश्रो लिंगी नं दु धइगु जानकारी बीगु नापं उमिगु अधिकार सुरक्षा यायेगु बारे सल्लाघारीइ छगू अन्तरक्रिया जुल । ज्याझ्वलय् तेश्रोलिंगी ब्यक्तित्व निलिमा व ज्योतिपिंसं थःपिंत जुयाच्वंगु यौन शोषण व अत्याचारया बाखं न्यंकादिल । रामेछापया छगू गामं वयाच्वंम्ह निलिमां न्हापां थः याकःचा हे जक उकथं अलग्ग लिंग जुयाः जन्म जूगु खः ला धकाः निराश जुयागु व लिपा लाजिम्पाटय् थ्यंका थः पासापिं नं दुगु सीवं धाःसा थःत म्वायेगु हौसला वःगु अनुभव न्यंकादिल ।
अन्तरक्रियाया सहजकर्ता ज्योतिपाखें नं थःपिं परिवार शिक्षा नागरिकता व रोजगारीपाखें बन्चित जुया च्वने माःगु पीडा न्ह्यब्वयादिल । नापं समिलंगी तेश्रो लिंगी हिजडा समाज व समाजय् उमित जुयाच्वंगु थीथी कथंया मिछंमगाः बारे ध्वाथुइकादीगु खः । अन्तरक्रियाय् थीथी संघ संस्थाया प्रतिनिधि व पत्रकारतय्सं न्यंगु न्ह्यसःया लिसः नं वय्कःपिंसं बियादीगु खःसा डकुमेन्ट्री 'सोचे जस्तो होइन जीवन' नं सार्वजनिक रुपं क्यंगु खः ।
