माओवादीया नक्साय् प्रदेश थप
यें (सन्ध्या टाइम्स) / थन न्ह्यानाच्वंगु माओवादीया पोलिटब्युरो बैठकं नेपाःयात जातीय आधारय् हे प्रदेश निर्माण यानाः संघीय प्रणालीइ यंकेगु निर्णय याःगु दुसा नापं न्हापा क्षेत्रीय रुपं लिउने लानाच्वन धयातःगु सेती महाकाली भेरी व कर्णाली अंचलयात आः खसान प्रदेश धकाः नां तयेगु निर्णय नं याःगु दु । थ्व लागा न्हापां-निसें खसतय्गु आदिभूमि जुयाच्वंगु व उपिं नं नेपाःया क्षेत्रगत रुपं उत्पीडित जाति जूगुलिं उगु लागाया नां ऐतिहासिक रुपं खसान हे तयेगु निर्णय याःगु खः ।
अथे हे नेपाःया उत्तरी हिमाली लागाय् च्वनीपिं भोटे व शेर्पा जातियात नं निगू अलग अलग हे प्रदेश बियाः भोटे व शेर्पा प्रदेश धकाः निगू प्रदेश थपे यायेगु निर्णय नं पार्टीं याःगु दु ।
बैठकं आः दयेकीगु न्हूगु संविधानया नां छु तयेगु धइगु खँय् नं सहलह याःगु दु । सहलह लिपा संविधानया नां 'लोकतान्त्रिक जनगणतन्त्र नेपालको संविधान' धकाः तयेगु निर्णय नं याःगु खँ नं सूत्रं धाःगु दु ।
बैठक थौं नं जारी दनि । बैठकय् पिहां वःगु फुक्क न्ह्यसःयात कयाः अध्यक्ष प्रचण्डं थौं लिसः बीगु खँ धाःगु दु ।
