नेवाः ब्यापारीया सुरक्षा माग
यें (सन्ध्या टाइम्स) / बौद्धया जेमिनी सुपरमार्केटय् ज्या याइपिं मजदूरतय्सं अनया थुवाः जगदिश मास्केयात याःगु आक्रमणयात कयाः थौं नेवाः जागरण माचं महानगरीय प्रहरी आयुक्तया कार्यवाहक आयुक्त भरत जीसीयात नाप लानाः स्वनिगःया आदिवासी नेवाः व्यापारीतय्सं निर्धक्क व्यापार यायेगु वातावरण तयार यायेत इनाप यात ।
माचया संयोजक सुजीव वज्राचार्यया नेतृत्वय् वंगु उगु पुचलं स्वनिगलय् अप्वया वनाच्वंगु सांगठनिक अपराध पनेगु लागिं नं इनाप याःगु खः ।
लिसलय् आयुक्त जीसीं शान्ति सुरक्षा कायम यायेत थःिपं तयार दु धासें समुदायपाखें थुकथंया हे सरोकार क्यन धाःसा अपराध पनेत अःपुगु बिचाः प्वंकादिल ।
थ्व स्वयां न्ह्यः माचं छगू ज्याझ्वः यासें जेमिनी सुपरमार्केटय् जूगु घटनाया बारे जानकारी कायेगु व बिचाः ब्याकेगु ज्या याःगु खः ।
