थौं स्वंगू तःधंगु पार्टीया बैठक
यें (सन्ध्या टाइम्स) / सरकार व विपक्षी तनाव झन् झन् अप्वया वनेवं उकियात साम्य यायेगु ताः तयाः थौं सरकारया नेतृत्व यानाच्वंगु पार्टी नेकपा एमाले व नेपाली कांग्रेसं प्रमुख प्रतिपक्षी एनेकपा माओवादी लिसे वार्ता यायेत्यंगु दु । थ्व स्वंगू पार्टी दथुइ ताःई लिपा थौं तिनि मंकाः रुपं वार्ता जुइत्यंगु खः ।
सूत्रतय्सं बिउगु जानकारी कथं थौं जुइगु वार्ताय् माओवादीयात एमाले व कांग्रेस निगुलिं पार्टीं सरकारय् दुहां वयाः ग्वाहालि यायेमाल धकाः इनाप यायेत्यंगु खँ सीदुगु दु । एमालेया हे नेतृत्वय् गठन जुइगु सरकारय् माओवादीयात नं समावेश जुइमाल धकाः थ्व निगू पार्टीं इनाप यायेत्यंगु खः ।
तर माओवादीं धाःसा सरकारय् वयेत अस्वीकार यासें राष्ट्रपतिया गलत पलाःयात संशोधन यायेमाःगु बिचाः प्रकट याइगु खँ धाःगु दु ।
माओवादीं देय्न्यंकं न्ह्याकेगु धकाः ताः तयातःगु आन्दोलन दिकाः सरकारयात ग्वाहालि यायेमाल धकाः नं इनाप याइगु खँ धाःगु दु ।
