योजना आयोगया उपाध्यक्षय् खतिवडा
सरकारं राष्ट्रिय योजना आयोगया उपाध्यक्षय् डा. युवराज खतिवडायात नियुक्त याःगु दु ।
मन्त्रीपरिषदया सोमवाः च्वंगु बैठकं खतिवडायात नियुक्त याःगु दु । सरकारं असार मसान्त दुने बजेट हयेगु तयारी यानाच्वंगु ईलय् बजेट निर्माण यायेगु ज्यायात प्राथमिकता बीगु कथं वयेकयात तत्काल नियुक्ति याःगु खँ धाःगु दु ।
सरकार हिलेवं पुलांगु सरकारं नियुक्त याम्ह उपाध्यक्ष गुणनीधि शर्मां पदं राजिनामा बियादीगु खः । खालि जुयाच्वंगु पदय् सरकारं एमाले निकट अर्थशास्त्री खतिवडायात नियुक्त याःगु दु । खतिवडा थ्वस्वयां न्ह्यः २०५९ सालय् आयोगया दुजः जुयादीधुंकूगु दुसाः वयेक नेपाल राष्ट्र बैंकया कार्यकारी निर्देशक कथं नं ज्यायानादी धुंकूगु दु ।
अथेहे मन्त्रीपरिषदया थौंया बैठकं संसद न्ह्याकेत माओवादीया माग कथं प्रधानमन्त्रीं संसदय् सम्बोधन याइगु विषयष नं सहलह जूगु खः । नापं मन्त्रीपरिषदया बैठकं म्हिग पीछडा वर्ग महासंघ व सरकार नाप जूगु प्यंगू बुँदे सहमतियात अनुमोदन याःगु दु ।
