दलित अधिकारकर्मीत दाःगु विरोधय् बागलुङ बन्द
जिल्ला प्रहरी ज्याकू दुने हे दलित अधिकारकर्मीतय्त दाःगु विरोधय् थौं दलित उत्पीडत समुदाया संजालं बागलुङ बन्द याःगु दु ।
दलित अधिकारकर्मीतय् आव्हान जूगु बन्दया कारणं सोमवाः बागलुङया जनजीवन अस्तव्यस्त जूगु दु । बन्दया झ्वलय् थीथी थासय् प्रहरी व बन्दकर्ता दथुइ झडप तकं जूगु दु । बानपा रामरेखाय् जूगु झडपय् लानाः प्यम्ह प्रहरीत घाःपाः जूगु दु । झडपय् तेजबहादुर राना, राम चौधरी, रामशरण काहर व काले गुरुङ घाःपाः जूगु दु ।
अथेहे समाचार संकलनया झ्वलय् वंम्ह नेपाल पत्रकार महासंघ जिल्ला शाखा बागलुङया उपाध्यक्ष रामबहादुर जिसी, एड्भोकेसी फोरमया बाबुराम अधिकारी व निकेश शर्मा लगायतयात प्रहरी ज्वना यंकूगु खः । ज्वना यंकूपिंत छुं ई लिपा हे त्वताः हःगु खः । अथेहे प्रहरीं पत्रकार दीपक गोतामेयात नं अभद्र व्यवहार यानाः ल्हाः वाःगु दु ।
झिन्हु न्ह्य: बागलुङ नगरपालिका १ रामरेखाया राहुल गोतामे व बागलुङ दमेकया निता पुनं बिस्यूवना: अन्तरजातिय इहिपाः याःगु खँयात कयाः प्रहरी ज्याकू दुने सहलह जुयाच्वंगु ईलय् विवाद अप्वयेवं प्रहरीं दलित अधिकारकर्मीत गोविन्द नेपाली, धनबहादुर परियार, परशुराम बोहोरा व राहुल गोतालयात दाःगु खः ।
