स्थानीय संयन्त्र देयेका सीमा विवाद समाधन यायेमाः : मेनन
भारतीय विदेश सचिव शिवशंकर मेननं भारतं नेपाःया सीमा अतिक्रमण मायाःगु धासें थुकीया निंतिं स्थानीय संयन्त्र देयेकाः याकनं समस्या समाधन यायेमाःगु खँ धयादीगु दु ।
निन्हुया निंतिं नेपाः भ्रमणय् झयादिम्ह मेननं थःगु भम्रण सिधेयेकाः लिहावने न्ह्यः यानादीगु पत्रकार सम्मेलनय् भारतं सीमा अतिक्रमण याःगु व भारतीय सुरक्षाकर्मीय्सं सीमा क्षेत्रया जनतायात ज्यादति जूगु खँ तथ्यगत मजूगु धयादिल । वयेकलं भारतं सीमाः अतिक्रमण याःगु धकाः नेपाःलय् छथ्वः पुचःतय्सं एकतर्फी प्रचार यायेगु ज्या जुयाच्वंगु धासें थंज्याःगु अतिरञ्जित प्रचार मयायेत इनाप यानादिल ।
भारत व नेपा: दथुइ खुल्ला सीमा जूगुलिं छुं सम्मस्या वःगु जुइफूगु तर सीमा क्षेत्रय् गम्भीर प्रकारया छुं सम्स्या मदुगु दाबी यानादिल - 'गुलिखें स्थानीय स्तरय हे समाधान यायेफइगु समस्या दु, उकीयात द्विपक्षीय सहलहपाखे समाधान यायेफइ ।'
सचिव मेननं ९८ प्रतिशत सीमा क्षेत्रय् कानुनी सीमाङ्कन स्पष्ट जूगु व सीमा स्तम्भ नं दुगु व ल्यंदनीगु २ प्रतिशतय् नं व्यवहारिक समस्या समाधन यायेफइगु बीचाः प्वंकादिल ।
वयेकलं भारतं नेपाःया आन्तरिक मामिलाय् गुवलें नं च्यूता मतःगु खँ न्ह्यथंनादिसें नेपाःया सरकार हिलेवं भारतया विदेश नीतिइ छुं नं ह्युपाः मवइगु धयादिल । वयेकलं भारतया नेपाःलय् शान्ति, प्रजातन्त्र व विकास बाहेक मेगू छुं नं स्वार्थ मदुगु धयादिल । नेपाली जनतां नेपाःया निंतिं याइगु दक्वं निर्णययात भारतं सम्मान याइगु खँ नं वयेकलं धयादिल । वयेकलं माधव नेपालया सरकार गठनय् नं भारतया छुं ल्हा मदुगु स्पष्ट यानादिल ।
नेपाः भ्रमणया झ्वलय् राष्ट्रपति, प्रधानमन्त्री मन्त्रीत थीथी दलया नेतात नापलायेगु झ्वलय् दक्वसित शान्ति प्रकृया व संविधान निर्माणयात प्राथमिकता बीत वयेकलं इनाप यानाःगु खँ धयादिल । वयेकलं शान्ति प्रकृयायात तार्किक निष्कर्षय् थ्यंकेत व न्हूगु संविधान निर्माण यायेत दक्वं राजनीतिक दलत जिम्मेवार जुइत इनाप यानादिल ।
निन्हुन्यंकया नेपाः भ्रमणय् विदेश सचिव मेननं राष्ट्रपति डा. रामवरण यादव, प्रधानमन्त्री माधवकुमार नेपाल, कांग्रेस सभापति गिरिजाप्रसाद कोइराला, माओवादी अध्यक्ष पुष्पकमल दाहाल 'प्रचण्ड', एमाले अध्यक्ष झलनाथ खनाल लगायत नेतात व मन्त्रीत नापलानादीगु ख: ।
