मंकाः धुकू सहकारी उलेज्या
येँ / (सन्ध्या टाइम्स) अस्थिर राजनीतिक अवस्थां यानाः आर्थिक स्तर थहां वनेमफुगु खँ नेपाल चेम्बर अफ कमर्शया अध्यक्ष सुरेन्द्रवीर मालाकारं धयादीगु दु । देय्या ल्याय्म्हतय्त औद्योगिक व व्यवसायिक क्षेत्रय् सक्रिय रुपं न्ह्यःने हयेगु खःसा देय् आर्थिक रुपं विकास जुयाः सम्पन्न जुइमाःगु खँ नं वय्कलं धयादिल ।
थनया थाय्मदुइ चायेकूगु मंकाः धुकू बचत तथा ऋण सहकारी संस्था लिमिटेडया उलेज्या यासें मूपाहां मालाकारं सरकार व व्यवसायीत जानाः आर्थिक रुपं स्तर थकायेगु सहकारीया विकासया निंतिं सहलह ब्याकाः न्ह्याः वनेमाःगु बिचाः नं वय्कलं प्वंकादिल ।
लिसें वय्कलं आर्थिक रुपं सबल यायेगु निंतिं नेवाः समाजयात छुं यानाः क्यने धइगु भावना ज्वनाः पिलू वःगु थुगु संस्थाया निंतिं माःगु कथंया ग्वाहालि यायेत चेम्बर अफ कमर्श सदां तयार दुगु नं कनादिल ।
मंकाः धुकूया नायः रमेशकाजी स्थापितया सभापतित्वय् जूगु ज्याझ्वः उलेज्या मूपाहां मालाकारं त्वाःदेवाय् मत च्याकाः यानादीगु खःसा नापं वय्कलं संस्थाया ज्याकू व लोगोया नं उलेज्या यानादीगु खः ।
ज्याझ्वलय् भिंतुना देछायेगु झ्वलय् नेवाः देय् दबूया नायः नरेश ताम्रकारं नेवाःतय् आर्थिक स्थिति कुहां वनाच्वंगु अनुभूति जुयाच्वंगु इलय् थुगु सहकारी संस्थां नेवाःतय्गु निंतिं छुं याना क्यनी धइगु विश्वास प्वंकादिल । लिसें वय्कलं नेवाः देय् दबूया खाता नं आः थुगु हे सहकारी संस्थाय् चायेकेगु जानकारी नं बियादिल ।
मंकाः धुकू बचत तथा ऋण सहकारी संस्था संचालक समितिया दुजः रमेशमान पियां लसकुस यासें सहकारी चायेकेमाःगुया कारण व संस्थाया उद्देश्य बारे कनादीगु खः ।
नेपालभाषा आन्दोलनय् ताः ई न्ह्यःनिसें सक्रिय ल्याय्म्ह भाषिक न्ह्यलुवा ज्याकःमित जानाः चायेकूगु थुगु सहकारी स्वनिगःया नेवाः समुदायप्रति केन्द्रित जुइगु खँ धाःगु दु ।
(किपा: - उदेन न्हुस्यामि)
