मन्त्री ल्ययेत मधेशीतय् ल्वापु
येँ / (सन्ध्या टाइम्स) सरकार विस्तारया झ्वलय् एमाले व कांग्रेसलिसेया कचवं समाधान जुइधुंकाः आः मधेशवादी दलतय् दुने हे मन्त्री जुइगु लागिं आन्तरिक कचवं पिहां वःगु दु । सूत्रं धाः कथं मन्त्री जुइपिनि नां तयार यायेगु ई त्ययेवं स्वंगुलिं मधेशवादी दल दुने ल्वापु पिहां वःगु दु ।
फोरमया गच्छदार पुचलय् शरदिसंह भण्डारीया नांयात कयाः विवाद वःगु दु । उपप्रधानमन्त्री विजय गच्छदारं शरतिसंह भण्डारीयात पर्यटन मन्त्री दयेकेगु कुतः यानादीगु खःसा मेपिं मेम्ह नेता रामजनम चौधरीं उकिया विरोध याःगु दु । थुकिं यानाः फोरमं नां धलः तयार याये मफुनि ।
उखे तमलोपाय् मन्त्री जुइपिनि विवादं यानाः अध्यक्ष महन्थ ठाकुरयात नांधलः तयार यायेगु जिम्मा बिउगु दुसा अन ह्दयेष त्रिपाठीं न्ह्यागु यानाः नं थःगु नां छ्वयेगु कुतः यानाच्वन धकाः मेपिंसं विरोध याःगु दु ।
मेखे छगू मन्त्रालय बियातःम्ह सद्भावना पार्टीं आः वयाः छगुलिं मगाः निगू मन्त्रालय माः धकाः दावी यानाहःगु दु । सद्भावनां निगू मन्त्रालय दावी यायेवं मधेशी फोरमयात मन्त्रालय बाँडफाँडया समस्या पिहां वःगु दु । सद्भावनां निगू मबिउसा सरकारय् वने मखु धायेधुंकूगु दु ।
