'स्वक्वःगु जनआन्दोलन आवश्यक'
येँ / (सन्ध्या टाइम्स) नागरिक सर्वोच्चताया निंतिं स्वक्वःगु जनआन्दोलन आवश्यक जूगु खँ पुलांम्ह प्रधानमन्त्री व माओवादी अध्यक्ष पुष्पकमल दाहाल 'प्रचण्डं' धयादीगु दु ।
'थाहा' आन्दोलनया नेता रुपचन्द्र बिष्टया झिक्वःगु लुमंति दिवसया झ्वलय् वय्कःया सालिक उलेज्या यायेत दामन झाःम्ह अध्यक्ष प्रचण्डं थौं सुथय् पत्रकार सम्मेलनय् उगु खँ धयादीगु खः ।
वय्कलं नागरिक सर्वोच्चता व लोकतन्त्रया निंतिं जननिर्वाचित सरकार आवश्यकता दु धासें राष्ट्रवादी शक्तित मिले जुयाः सैनिक सर्वोच्चता विरुद्ध आन्दोलन यायेगु निंतिं थःपिंसं तयारी यानाच्वनागु खँ नं कनादिल ।
वर्तमान सरकार कतांमरि सरकार जक खः धासें वय्कलं सरकारं नागरिक सर्वोच्चतायात उपहास यानाः सैनिक सर्वोच्चतायात प्राथमिकता बियाच्वंगु द्वपं नं बियादिल ।
