९ महिने ज्याझ्वःयात निरन्तरता बिउ
येँ / (सन्ध्या टाइम्स) एमालेया गुलाया शासनकालय् न्ह्याकूगु ज्याझ्वःयात निरन्तरता बीत सभासद्तय्सं प्रधानमन्त्री माधव नेपालयात आग्रह यानादीगु दु ।
वइगु बजेटया विषयलय् प्रधानमन्त्री नेपाललिसे सहलह यायेगु झ्वलय् पश्चिमाञ्चल विकास क्षेत्रया सभासद्तय्सं वय्कःयात उगु आग्रह यानादीगु खः ।
सभासद्तय्सं प्रम नेपालयात माओवादीं हःगु गुलिखें कार्यक्रम बांलाःगु धासें उकियात नं दुथ्याकेत सुझाव बियादीगु खः । उमिसं बजेट दयेकेगु झ्वलय् एमालेया कार्यकालय् पूवंके मफुगु थीथी ज्याझ्वःयात हाकनं दुथ्याकेत नं सझाव बिउगु खः ।
थ्वहे झ्वलय् बजेट दयेकेत पुलांम्ह अर्थमन्त्री डा. बाबुराम भट्टराईयात वर्तमान अर्थमन्त्री सुरेन्द्र पाण्डें इनाप यानादीगु खँ सीदुगु दु । थौं सुथय् अर्थमन्त्री पाण्डें डा. भट्टराईयात टेलिफोन यानाः बजेट दयेकेत माःगु ग्वाहालि याना बीमाल धकाः इनाप याःगु खँ सूत्रं धाःगु दु ।
