हेटौंडाय् विहारया दँमुँज्या
हेटौंडा / (सन्ध्या टाइम्स)ज्ञानमाला भजन खलःया केन्द्रीय अध्यक्ष व बौद्ध विद्वान सुवर्ण शाक्यं बौद्ध विहार धइगु विश्वशान्तिया न्ह्यलुवा भगवान बुद्धया उपदेशकथं सुमार्गया शिलाचरण स्थल जूगु खः धयादीगु दु । थनया प्रज्ञा महाविहार चौकित्वाःया निक्वःगु साधारणसभाया उलेज्या यासें वय्कलं थ्व खँ खः । बौद्ध विहार व मेमेगु संघसंस्थाया दथुइ यक्व हे पाःगु धारणा प्वंकादिसें वय्कलं मसः मसिउपिं अज्ञानी मनूतय्त बुद्धया ज्ञानया सार संक्षेप स्यनेगु कनेगु व दिव्यज्ञान हासिल यानाः उपदेश प्राप्त यायेगु शान्तगु प्रार्थना स्थल खः धयादिल ।
भाजु शाक्यं न्ह्यागु ज्या नं हथासं यायेबलय् छक्वलं विकास याये मफइगु खँ न्ह्यथनादिसें छगू निगु त्वाथः गयाः बुलुहुँ न्ह्यज्यात धाःसा सफल जुयाः छसीकथं विकास जुइ धइगु खँया दसि थौं हेटौंडाया प्रज्ञा महाविहार व ज्ञानमाला भजन खलं: जुयाच्वंगु दु धयादिल ।
प्रज्ञा महाविहारया सल्लाहकार पवन शाक्यं लसकुस यासें न्ह्याःगु उगु ज्याझ्वलय् महाविहारया छ्याँजे अशोकराज शाक्यं विहारया ज्याखँ बारे जानकारी बियादिल । कोषाध्यक्ष प्रेम शाक्यं आर्थिक प्रतिवेदन न्ह्यब्वयादिल । प्रज्ञा महाविहारया नायः नियमराज शाक्यया सभापतित्वय् जूगु उगु ज्याझ्वलय् सल्लाहकार अशोक शाक्य व ज्ञानमाला भजन खलःया नायः गुणराज शाक्यंपिंसं नं नुगःखँ प्वंकादीगु खः ।
ज्याझ्वलय् विहारया उपासक उपासिकापिंसं ज्ञानमाला भजन नं न्यंकूगु खः।
-मोहनमान सांगामीपाखें
