तांन्वयाः छम्ह सित
वीरगाज / (सन्ध्या टाइम्स) पर्सा व बाराय् तच्वकं तांन्वयाः छम्ह सीगु दु । तसकं तांन्वयाः पसा्रया धोरेया ६० दँया कृष्णदेव मेहता बेहोश जूगु खःसा वयात वासः यायेत अस्पतालय् यंकाच्वंगु इलय् मदुगु खः ।
छवाः न्ह्यःनिसें अप्वया वनाच्वंगु गर्मीं यानाः तराई लागाय् क्वाःगु लू शुरु जुइवं मनूतय् न्हिथंया ज्या यायेत तकं थाकुयाच्वंगु दु । अनया बजाः ठप्प जुयाच्वंगु दुसा अस्पतालय् नं विरामीया ल्याः अप्वया वनाच्वंगु खँ जिमि संवाददातां धाःगु दु ।
तच्वकं तांन्वःगुलिं अन थीथी कथंया ल्वय् नं अप्वया वनाः अस्पतालय् विरामीतय् ल्याः अप्वया च्वंगु दु । विशेष यानाः अनया मस्त थीथी कथंया ल्वचं प्रभावित जुयाच्वंगु खँ धाःगु दु ।
तांन्वःगुलिं यानाः उगु लागाय् वा पीत तयातःगु पुवाचा तकं गना वनाच्वंगु दुसा बुँज्या यायेगु ज्या नं प्रभावित जुयाच्वंगु दु । वीरगाजय् थ्व इलय् अधिकतम तापक्रम ४० निसें ४५ डिग्री तक थ्यनाच्वंगु खँ जिमि संवाददातां धाःगु दु ।
