विपक्षी मदुगु राष्ट्रिय सरकारया प्रस्ताव
थन न्ह्यानाच्वंगु एनेकपा (माओवादी)या पोलिटब्युरो बैठकं देशय् विपक्षीविहिन राष्ट्रिय सरकार गठन यायेगु न्हूगु प्रस्ताव न्ह्यःने हःगु दु । माओवादीया अध्यक्ष पुष्पकमल दाहाल 'प्रचण्डं'उगु प्रस्ताव पार्टीइ न्ह्यब्वयादीगु खःसा पार्टीपाखें उकियात लसक्रस यासें अन्य पार्टी समक्ष उकियात पेश यायेगु निर्णय याःगु दु ।
खतुं विपक्षीविहीन राष्ट्रिय सरकार गठनया अनौपचारिक प्रस्ताव माओवादीं थ्व स्वयां न्ह्यः थम्हं हे सरकार गठन यायेगु इलय् नं तःगु खः । तर अबलय् एमाले व कांग्रेसलिसे माओवादीया स्वापू बांमलानाच्वंगु कारणं अज्याःगु सरकार गठन यायेगु सम्भावना मंत । लिसें नेपाली कांग्रेसं अज्याःगु सरकार गठन याकेगु वातावरण नं तयार याके मबिल । फलतः मेपिं फुक्क सरकारय् वंसां कांग्रेस याकःचा विपक्षीइ च्वनाः राष्ट्रिय सहमतिया सरकार दयेकेगु जनताया इच्छाय् लः प्वंका बिल ।
दक्षिण अफ्ररीकाय् नं संविधानसभाया निंतिं चुनाव अबलय् बहुमत वःगु पार्टी नेशनल अपि्रुकी कंग्रेसया अध्यक्ष नेल्सन मण्डेलां चुनावय् ल्वाःगु फुक्क हे पार्टीयात सरकारय् समावेश यानाः विपक्षी मदुगु राष्ट्रिय सरकार गठन यानादीगु खः । उकिं यानाः संविधान दयेकेगु अवधिभर कम से कम सरकारय् छुं समस्या पिहां मवलसा सरकारं नं संविधान दयेकेगु ज्याय् पूर्ण रुपं ग्वाहालि यायेफत तर नेपालय् नेपाली कांग्रेसया मूर्खतापूर्ण पलाखं यानाः अज्याःगु वातावरण निर्माण मजुल व देशय् थज्याःगु स्थिति ब्वलनाच्वन । उकिं आः माओवादीं न्ह्यःने हःगु प्रस्ताव अतिकं ग्रहणयोग्य जू । थुकी नेतृत्वय् सु च्वनेगु धइगु विवाद मयासे पलाः न्ह्याकेफुसा यक्व बांलाइ ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
