सरकारी ज्याकू घेराउया झ्वलय् थीथी थासय् झडप
एकीकृत नेकपा (माओवादीं) याःगु सरकारी ज्याकू घेराउया झ्वलय् येँय् लगायतया जिल्लाय् प्रहरीनाप झडप जूगु दु । येँय्, इलाम, काभ्रे, मोरङलगायत जिल्लय् माओवादी कार्यकर्ता व प्रहरी दथुइ झडप जूगु खः ।
धादिङय् माओवादी कार्यकर्तातय्सं सराकारी ज्याकूथी कर्मचारीतय्त दुहांवने मबीवं उत्पन्न तनाव अप्वयेवं अन स्थानीय प्रशासनं न्हिनय् स्वताः त्याः ई निसे कन्हय् सुथय् प्यताः ई तक कर्फ्यु तःगु दु ।
धादिङया स्थानीय विकास अधिकारी व प्रहरी निरीक्षयात माओवादी कार्यकर्तातय्सं दुव्र्यवहार यायेवं स्थिति थप तनावपूर्ण जुइ मबीत स्थानीय प्रशासनं कर्फ्यु आदेश जारी याःगु खः । माओवादीं जिल्ला विकास समितिया ज्याकूथी कमाचारीतय्त दुहावने मबीवं अन प्रहरी व माओवादी कार्यकतातय् दथुइ झडप जूगु खसाः लिपाः माओवादी कार्यकर्तातय्सं समितिया ज्याकूथु तोडफोड याःगु खः । तोडफोड शुरु जुइवं माओवादी कार्यकर्तातय्तनाप खँल्हायेगु झ्वलय् माओवादीं स्थानीय विकास अधिकारी रमेशकुमार अधिकारि व प्रहरी निरीक्षक उद्धव भारतीयात दुव्र्यवहार याःगु खः ।
अथेहे माओवादीं येँया सिंहदरवार न्ह्यने धरणा बीवं प्रहरीं निषेधित क्षेत्रय् दुहांवःगु धासें बल प्रयोग याःगु खः । प्रहरीं बल प्रयोग यायेवं माओवादी कार्यकर्तातय्सं अप्पां कयेकूगु खसाः लिपाः प्रहरीं नं अप्पां केयेकेत शुरु याःगु खः । अप्पां लानाः फोटो पत्रकारत निरज सापकोटा, विजय राई व बालकृष्ण थापा घाःपाः जूगु दु । अथेहे प्रहरीं याःगु लाठीचार्जय् लानाः माओवादी सभासद् डबलबहादुर शाह लगायत कार्यकर्तात घाःपाः जूगु दु ।
देयेन्यंक प्रदर्शन यायेगु झ्वलय् माओवादी कार्यकर्तातय्सं काभ्रे जिल्ला प्रशासनतय् तालाबन्दी यायेत्यंवलय् प्रहरीं लाठी चार्ज याःगु खः । उकी लानाः प्यम्ह माओवादी कार्यकतात घाःपाः जूगु दु । अथेहे मोरङय् नं सरकारी ज्याकू घेरउ यायेगु झ्वलय् प्रहरी नाप झडप जूगु खः । झडपय् लानाः खुम्हस्वां अप्वः माओवादी कार्यकर्तात घाःपाः जूगु दु ।
अथेहे बैतडी, बर्दीया, महोत्तरी, रामेछाप, घनकुटा, इनरुवा लगायत थासय् माओवादी कार्यकर्ता व प्रहरी दथुइ जूगु झडपय् लानाः नीम्ह स्वयां अप्वः माओवादी कार्यकर्ता व प्रहरीत घाःपाः जूगु दु ।
नागरिक सर्वोच्चता कायम यायेत माओवादी नेतृत्वया सरकारं या:गु निर्णयत एमाले नेतृत्वया सरकारं खारेज या:गु धासें माओवादीं आइतवा: देयेन्यंकया दक्वं सरकारी ज्याकूथी घेराउ या:गु ख: ।
